Aljırde áskerı ushaq apatynan 257 adam qaıtys boldy
Aljırde áskerı ushaq apatqa ushyrady. Memlekettiń qorǵanys mınıstrliginiń habarlaýynsha, ushaqta 257 adam bolǵan. Olardyń eshqaısysy tiri qalmaǵan. Olardyń 247-si áskerıler men olardyń otbasy músheleri bolsa, qalǵan on adam ekıpaj músheleri. Qaıtys bolǵandar týraly aqparat naqtylanyp jatyr.
Oqıǵa Býfarık áýejaıyna jaqyn mańdaǵy Blıda aýylynda bolǵan. Il-76 áskerı ushaǵy Býfarıktegi áskerı bazanyń aerodromynan ushqan soń Aljır qalasynyń ońtústiginen 50 km jerde qulaǵan. Apat jergilikti ýaqyt boıynsha tańǵy 8-de bolǵan. Ushaq qulaǵan soń birden órt shyqqan. Ushaqtyń qulaý sebebi áli belgisiz. Algérie24 agenttiginiń habarlaýynsha, ushaq memlekettiń soltústigindegi Blıda qalasynan ońtústik-batysqa bet alǵan. Jolaýshylardyń kópshiligi áskerı qyzmetkerler ekeni habarlanyp jatyr.
Qyrǵyzstan Prezıdenti Túrkııaǵa resmı saparmen bardy
9-10 sáýir kúnderi Qyrǵyzstan Prezıdenti Sooronbaı Jeenbekov resmı saparmen Túrkııaǵa baryp, Rejep Taııp Erdoǵanmen kezdesti. Prezıdentter keńeıtilgen jáne shaǵyn quramda eki el arasyndaǵy yntymaqtastyq pen ony nyǵaıtý baǵyttary týraly talqylady.
Memleket basshylarynyń aıtýynsha, Túrkııa men Qyrǵyzstan arasyndaǵy saýda aınalymy jylyna 1 mlrd dollardy quraıdy. Sonymen qatar 1992 jyldan beri Qyrǵyzstannyń 3500 stýdenti Túrkııadan bilim stıpendııasyn alǵan. Rejep Taııp Erdoǵannyń aıtýynsha, «Manas» qyrǵyz-túrik ýnıversıteti bilim salasyndaǵy ortaq sátti joba.
Kezdesý barysynda Qyrǵyzstan prezıdenti Túrkitildi memleketter keńesiniń kómegimen kóptegen jobalardyń sátti iske asyrylǵanyn atap ótti. Onyń ishinde Kóshpendilerdiń búkilálemdik oıyndary, Astanadaǵy Halyqaralyq Túrki akademııasy, Bakýdegi túrki mádenıeti men halqynyń qory sekildi jobalar bar.
DDSU hımııalyq shabýyl bolǵan jerdi kórsetýdi talap etti
Dúnıejúzilik densaýlyq saqtaý uıymy Sırııadaǵy Dýma qalasyna esh kedergisiz kirýge ruqsat berýdi talap etti. Sırııa bıligi hımııalyq qarýdyń qoldanylýyn joqqa shyǵarǵanymen, uıym barlyq jaǵdaıǵa ózderi kóz jetkizgisi keletinin málimdedi.
«Shabýyl týraly tarap jatqan aqparat pen Dýmadaǵy adam shoshyrlyq sýretter kúnnen-kúnge artýda. Sondyqtan Dúnıejúzilik densaýlyq saqtaý uıymy osy óńirge erkin kirip, zardap shegýshilerge kómek kórsetkendi jón kóredi. Qoǵamdyq densaýlyq saqtaý sharalaryn baǵalaý úshin esh kedergisiz tez arada qalaǵa kirgizýdi talap etedi», delingen uıym habarlamasynda.
Sırııadaǵy oppozısııa ókilderi, qutqarýshylar men medısına qyzmetkerleriniń aıtýynsha, Shyǵys Gýtadaǵy Dýmaǵa úkimet kúshiniń shabýyly barysynda ýlaǵysh hımııalyq zattarǵa toltyrylǵan bombalar qoldanylǵan. Sırııa-amerıkalyq medısına qyzmetkerleriniń aıtýynsha, medısına ortalyqtaryna hımııalyq zattardyń áserin kórsetetin belgilermen 500-den astam adam túsken. Ázirge qaıtys bolǵandar sany naqty atalmady.
Sýkerberg keshirim surady
Facebook áleýmettik jelisiniń basshysy Mark Sýkerberg alǵash ret AQSh senatynyń zań komıteti men saýda komıtetteriniń birlesken otyrysyna qatysty. Onda Sýkerberg senatorlarǵa áleýmettik jelidegi jeke málimetterdiń qaýipsizdigi, onyń ishinde Cambridge Analytica fırmasyna qatysty daý-damaı týraly suraqtarǵa jaýap berdi. Al dúısenbi kúni ol kongres ókilderiniń palatasynda baıandama jasap, keshirim surady. «Kompanııa jeke málimetterdiń saqtalýy men tutynýshylardy qorǵaýǵa qatysty jetkilikti shara qoldanbaǵan. Bizge júktelgen bar jaýapkershilikti bilmeppiz. Bul meniń qateligim jáne men buǵan ókinemin. Men Feısbýkti qurdym, ony basqaramyn jáne osynda bolyp jatqan oqıǵanyń bárine jaýaptymyn», dedi Mark Sýkerberg.
Sholýdy daıyndaǵan Gúlnur QÝANYShBEKQYZY,
«Egemen Qazaqstan»
