Qazirgi ýaqytta atalǵan ishki baǵdarlamalar aıasynda oblysta 57 joba júzege asyrylýda. Bul rette «Tárbıe jáne bilim» ishki baǵdarlamasy sheńberinde júzege asyrylyp jatqan «Úsh tilde bilim berý» jobasyn erekshe atap ótýge bolady. О́tken jyly aımaqtyń 2430 muǵalimi tildik kýrstardy támamdady. Aǵylshyn tili pániniń barlyq muǵalimderi emtıhan tapsyrdy. Qazirgi ýaqytta 23 muǵalim 14 qanatqaqty mektepte 8-synyp oqýshylaryna jaratylystaný pánderin aǵylshyn tilinde júrgizýde. Bıyl taǵy da 1300 muǵalimdi oqytý josparlanǵan.
«Rýhanı bilim berý» jobasy aıasynda byltyr oblystyq bilim basqarmasy men din isteri jónindegi basqarmasynyń birlesýimen aqparattyq-nasıhattyq top músheleri, uzyn sany 162 adam 3 aılyq kýrstan ótkizilgen. «Bilikti maman» jobasy sheńberinde óńirdegi joǵary oqý oryndarynyń básekege qabilettiligin arttyrýǵa, ǵylymı-tehnıkalyq jáne zertteý bazalaryn jaqsartýǵa, oblystaǵy mektep bitirýshilerdiń basqa elge ketýin azaıtýǵa aıryqsha kóńil bólinýde. Osy maqsatta 2017 jyly oblystyq bıýdjetten 200 grant bólinse, 2018 jyly 400 grant qarastyrylyp otyr. Osynyń nátıjesinde shetelge, onyń ishinde Reseıge ketetin túlekter sany birshama azaıǵan (2016 jyly – 1800, 2017 jyly – 890, 2018 jyly – 612).
«Rýhanı qazyna» ishki baǵdarlamasy boıynsha oblysta 16 joba júzege asyrylýda.
Azamat QASYM,
«Egemen Qazaqstan»
Shyǵys Qazaqstan oblysy
