Elbasy Nursultan Nazarbaevtyń «Prezıdenttiń bes áleýmettik bastamasy» atty Qazaqstan halqyna Úndeýin el turǵyndarymen birlesip talqyladym, halyq barynsha qoldaý bildirýde. Sonymen qatar turǵyndar tarapynan kóterilgen talap-tilekterin tyńdap, ótinishterin qabyldadym.
Sondaı kezdesýlerdiń barysynda kóterilgen máselelerdiń biri – Almaty oblysy Uıǵyr aýdany Dobyn aýylyndaǵy kóldiń jaǵdaıy. Aýyl turǵyndary jaǵdaıdy baıandaǵan soń ózim baryp, kóldiń jaı-kúıimen tanystym. Mamandardyń aıtýynsha, 800 myń tekshe metrdeı sý sııatyn kól Dobyn aýylynyń joǵary jaǵynda, aýyldan 100 metrdeı jerde jáne aýyl deńgeıinen bıik jerde ornalasqan. Al onda jınalǵan sý mólsherden áldeqaıda asyp ketken eken. Nátıjesinde kóldiń topyraqtan jasalǵan jaǵalaýy, tospasynyń syrt jaǵy birtindep sazdanyp buzyla bastapty. Tipti tospanyń tómen jaǵynan syzattap sý aǵa bastaǵan. Kóldiń birneshe jyldan beri jóndeý kórmegen bul tospasy buzylyp, sý ketken jaǵdaıda Dobyn aýylynyń myńnan astam turǵyny men úı-jaılary topan sý astynda qalyp, adamdardyń ómirine úlken qaýip tóngeli tur.
Osyǵan oraı, men Premer-Mınıstr Baqytjan Saǵyntaevtyń atyna depýtattyq saýal joldap, atalǵan kóldiń tospasyn kúrdeli jóndeý máselesin tez arada qarastyrýdy ótinip, Dobyn aýylynyń turǵyndaryn apattan saqtap qalý sharasyn qoldanýdy suradym.
Másele dereý sheshilmese jaǵdaı qıyndyqqa soqtyrary sózsiz, men jáne Dobyn aýylynyń myńdaǵan turǵyny Úkimet basshysynyń máselege basa nazar aýdarýynan úmittimiz.
Shaımardan NÝRÝMOV,
Májilis depýtaty
