Jaıly baspanalarǵa turǵyn úı qurylys jınaq bankiniń salymshylary birinshi kezekte ıe bolady. Jýkov kóshesindegi kópqabatty úılerdiń birnesheýin «PMK-5» seriktestigi turǵyzýda.
«78 páterlik kópqabatty úıdiń qurylys montajdaý jumystary aıaqtalýǵa jaqyn. Kúzge deıin paıdalanýǵa beremiz.Sapa basty nazarda», deıdi mekeme dırektorynyń orynbasary Altaı Álibaev.
Jýkov kóshesinde boı kóteretin 4 úıdiń 3-i jyl aıaǵyna deıin qoldanysqa beriledi. Árqaısysy– 78-80 páterlik. Osy kúnderi "Bereke" shaǵyn aýdanynda da qurylys jumystary qyza túsken. Eki kópqabatty úıdi turǵyzý "Pılon" seriktestigine senip tapsyrylǵan. "Jas órken" yqsham aýdanynda qurylysshylar eki aýysymda eńbek etedi. Kelesi jyly osy mańaıda 12 qabattan turatyn monolıtti úıler paıda bolady. Ony salýmen «Kazgradstroı NS» kompanııasy aınalysady. Ár sharshy metri 140 myń teńge tóńireginde. «Osnovanıe» kompanııasy 9 qabatty turǵyn úıdiń qurylysyn bastady. 332 páterlik baspananyń birinshi qabatynda mektepke deıingi shaǵyn ortalyqtar ornalasady.
Qazaqstannyń Turǵyn úı qurylys jınaq banki salymshylarynyń biri Jabaı Orazalınniń aıtýynsha otbasynyń qarajat jınaǵanyna bir jyldan asypty. Jas órken" yqsham aýdanynda ornalasqan bul úıden Natalıa Glyvıak ta 3 bólmeli páter alýǵa salymshy bolyp tirkelgen.
«Baspanalar turǵyn úı qurylys jınaq bankiniń salymshylaryna jáne baspana kezeginde turǵandarǵa beriledi. Ipotekalyq nesıeniń jyldyq mólsherlemesi– 5 paıyz. Salymshynyń esepshotynda páter qunynyń 30 paıyzy bolýy tıis. Úzbeı aqsha jınaǵandardyń baspana alý múmkindigi joǵary. Qazir bizdiń bankte 35 myń salymshy bar», deıdi «Qazaqstannyń turǵyn úı qurylys-jınaq banki» AQ SQOF-nyń dırektory Raıhan Ábdirahmanova.
О́mir Esqalı
«Egemen Qazaqstan»
Soltústik Qazaqstan oblysy
