Eki kúndik jumys saparynyń alǵashqy kúninde olar áýeli oblystyq mektep olımpıadalary men mektepten tys is-sharalar ótkizý ortalyǵynda bolyp, «Áıelder quqyqtary men múmkindikterin keńeıtý» taqyrybynda sheberlik sabaǵyn ótkizdi. Kolledj stýdentterimen kezdesý barysynda Elena Tarasenko qyzdarǵa bolashaqta tek jaqsy otanasy atanyp qana qoımaı, el damýyna eleýli úles qosatyn bilikti maman bolýǵa umtylý kerektigin aıtyp, óziniń qyzmettik jáne ómirlik tájirıbesimen bólisti.
О́z sózinde Beksultan Tutqyshev memlekettiń jastarǵa kórsetip otyrǵan qoldaýy men múmkindigin áńgimeleı kele, jastardy Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy men «Prezıdenttiń bes áleýmettik bastamasy» atty Úndeýinde kórsetilgen mindetterdi birlese júzege asyrýǵa shaqyrdy.
Jambyl oblysyna jumys sapary aıasynda Elena Tarasenko men Beksultan Tutqyshev «Nurálim» memlekettik-jekemenshik saýyqtyrý balabaqshasyna bardy. Balabaqsha quryltaıshysy, oblystyq máslıhattyń depýtaty Gúldara Nurymova zamanaýı ári balalarǵa jaıly mekemeniń barlyq bólimderi men toptaryn tanystyrdy. Atalǵan mekemeniń jaǵdaıymen jiti tanysqan olar balalar bolashaǵynyń jarqyn bolýyna tilektestik bildirdi.
Búgingi tańda áıel teńdigi álemdik máselege aınalyp otyr. Taǵdyrdyń túrli tar jol, taıǵaq keshýlerine tap bolǵan áıelder máselesi qoǵam úshin qaı kezde de ózekti. Osy oraıda, Ulttyq komıssııa músheleri turmystyq zorlyq-zombylyq qaýpi saldarynan ómirlik qıyn jaǵdaıǵa túsken áıelderge arnalǵan oblystyq daǵdarys ortalyǵynda boldy. Búginde otbasylyq, turmystyq jaǵdaılarynyń áserinen atalǵan ortalyqty jeti ana balalarymen birge panalap otyr. Oblystyń ár aýdanynan kelgen olarǵa bul jerde áleýmettik, psıhologııalyq kómekter kórsetilip, úsh aıdan alty aıǵa deıin jaǵdaı jasalady. Bir qýanarlyǵy, kóbinese atalǵan ortalyqty panalaǵan jandardyń osy merzimge deıin-aq máseleleri rettelip, otbasylaryna oralady eken.
Ulttyq komıssııa tóraǵasynyń orynbasary Elena Tarasenko men komıssııa múshesi Beksultan Tutqyshev Jambyl oblysyna jumys saparynyń ekinshi kúninde Taraz qalasyndaǵy «Araı plaza» kesheninde ótken «Áleýmettik saıasattaǵy jáne jergilikti ózin-ózi basqarý máselelerindegi keshendi genderlik tásildiń prınsıpteri» atty semınar-trenıngke qatysty. Atalǵan sharaǵa Jambyl oblysy ákiminiń orynbasary Erqanat Manjýov qatysyp, óńirde genderlik saıasat jumystarynyń óz deńgeıinde júrip jatqanyn aıtsa, EQYU Astanadaǵy keńsesiniń adamı ólshemder bóliminiń meńgerýshisi Izabella Hartman bul baǵyttaǵy jetistikter men júıeli jumystardyń mańyzdylyǵyna toqtalyp ótti. Sonymen qatar ulttyq komıssııa músheleri de elimizdegi genderlik saıasat jónindegi oılaryn ortaǵa saldy. Bir qolymen besikti terbetse, ekinshi qolymen álemdi terbetetin áıel zatyna artylar mindettiń kóp ekeni de aıtyldy.
Hamıt ESAMAN,
«Egemen Qazaqstan»
Jambyl oblysy
