Bul jóninde «Atasý kentinde az tonnaly munaı óńdeý zaýytynyń qurylysy» jáne «Iýrta» janar-jaǵarmaı beketteriniń qurylys jobalary jóninde óńir basshysy Erlan Qoshanov ótkizgen keńes barysynda belgili boldy.
300 mlrd teńgeniń jobasy
Jalpy, bul joba sátimen iske asqanda, munaı óndirýden bastap daıyn ónimdi satýǵa deıingi aralyqty qamtıtyn óndiristik tolyq sıkl saltanat qurady. Atasý kentinde zaýyt qurylysy jáne qajetti ınfraqurylym jasaý jumystary júrgizilip jatqanda onymen bir mezgilde Qostanaı oblysyndaǵy «Novonejınskoe» ken ornynda geologııalyq barlaý qolǵa alynyp, munaı óndirý qosa júrgizilmek. Budan bólek, dál osy kezeńde búkil Qazaqstan boıynsha 260 «Iýrta» janar-jaǵarmaı quıý beketiniń qurylysy bastalady. Aıta ketý kerek, bul avtomaı quıý stansalarynyń 26-sy Qaraǵandy oblysynyń aýmaǵynda salynbaqshy. Investorlardyń aıtýynsha, janar-jaǵarmaı quıý beketterin jobalaý barysynda damyǵan elderdiń ozyq tájirıbeleri eskerilgen eken. Munyń ózi jol boıyndaǵy servıstiń joǵary deńgeıge kóterile bastaýyna jáne eldegi týrızmniń damýyna ıgi áserin tıgizeri sózsiz dep esepteıdi ınvestorlar.
«Novonejınskoe» munaı ken ornynda 25 uńǵyma burǵylanady. Jańa zaýytqa Qostanaıdan temir jol arqyly jetkiziletin munaıdyń 1 mıllıon tonnasy óńdeletin bolady. Bul – bir jyldaǵy mólsher. Osynyń ózi elimizdegi ishki naryqtyń 10 paıyzǵa jýyǵyn jabýǵa múmkindik beredi.
Jalpy quny 300 mıllıard teńge bolatyn iri jobany aıaǵyna deıin jetkizýge úsh jyldaı ýaqyt ketedi eken. Iаǵnı jospar boıynsha, qurylys bıyl bastalyp, 2021 jyly máresine jetýi tıis.
Eýro-5 benzınin óndiredi
«Abylaıhan» kompanııalar tobynyń basqarma tóraǵasy Ámir Ysmaǵulov zaýyttyń munaı óńdeýde gıdrokrekıng dep atalatyn tehnologııaǵa arqa súıeıtinin atap ótti. «Atasý munaı óńdeý zaýytynyń ónimderi halyqaralyq standarttar talabyna saı bolady», dedi ol senimdi túrde.
Gıdrokrekıng tehnologııasy eýro-5 standartty benzın men Jet-A1 markaly avıasııalyq otyn alýǵa múmkindik beretin kórinedi. Sondaı-aq munaı ónimderi Qostanaıdan zaýytqa jetkizilgende, shıkizat oıl-tanker tehnologııasyna sáıkes arnaıy syıymdylyq ydystaryna quıylyp, mór basylyp, sodan keıin ǵana janar-jaǵarmaı beketterine jetkiziledi. Mamandardyń aıtýynsha, mundaı tásil tutynýshyny sapaly jáne mol ónimmen qamtamasyz etýge múmkindik beredi jáne munaı qoımasyna degen táýeldilikten aryltady eken.
О́z kezeginde «R Way Solution PTE Ltd» kompanııasynyń basshysy Ragýnandan Balasýbramanıan ınvestısııa salardan buryn atalǵan jobanyń óńir ekologııasyna, áleýmettik jaǵdaıyna qanshalyqty áser etetinine barynsha nazar aýdaratyndyqtaryn jetkizdi. «Biz strategııalyq ınvestormyz. Qandaı da bir elge ınvestısııa quımas buryn áýeli sol jer halqynyń jaǵdaıyna, onyń ekologııasyna áser etetin jaıttardy jan-jaqty zertteımiz. Sóıtip keleńsizdik týdyratyn jaǵdaılardy meılinshe azaıtýǵa tyrysamyz. Sonymen qatar biz sońǵy tehnologııalardy ákelemiz. Áleýmettik jobalardy da nazardan tys qaldyrmaı, ınfraqurylymǵa da kóńil bólemiz. Jalpy, energetıkalyq jobalardyń mańyzy zor», dedi sıngapýrlyq ınvestor.
800 adamǵa úı salady
«Abylaıhan» JShS basshysy ınvestor qarastyrǵan kezde qaltaly kompanııanyń ekologııa men áleýmettik jaǵdaıǵa degen kózqarasyna basa mán bergendikterin aıtty. «Mysaly, – dedi ol, – «R Way Solution PTE Ltd» kompanııasynyń tabystyń qomaqty bóligin túrli elderde áleýmettik jaǵdaıy tómen jandarǵa arnap emhanalar salýǵa jumsaıtynynan jaqsy habardarmyz. Sonymen qatar olar kún jáne jel energııasyn damytýdy qoldaıdy eken. Al bizde kún men jel degenińiz jetip artylady».
Aıtsa aıtqandaı, sheteldik ınvestor Atasý kentinde zaýyttyń 800 jumyskerine arnap turǵyn úı qalashyǵyn, medısına ortalyǵy men sport keshenin jáne balabaqsha syndy áleýmettik mańyzy zor nysandar salmaqshy. Sonymen qatar zaýytta jumys isteıtin mamandardy oqytý úshin kentte kolledj ashý da josparlarynda bar eken.
«R Way Solution PTE Ltd» kompanııasy basshysynyń aıtýynsha, bizdiń elge degen qyzyǵýshylyqtyń týýyna mundaǵy ınvestısııalyq ahýaldyń qolaılylyǵy sebepshi bolǵan eken. Sonymen qatar ol Qazaqstanda jańa tehnologııalardy endirýdiń zor múmkindikteri barlyǵyn jáne mundaǵy «jasyl» ekonomıkany damytýǵa degen qulshynystyń joǵarylyǵyn atap ótti.
Sátin salyp jańa zaýyt paıdalanýǵa berilgende 800 adam turaqty jumyspen qamtamasyz etiledi. Al oblysqa tıesili 26 janar-jaǵarmaı beketi iske qosylǵanda, bul salada barlyǵy 1200 adam adal nanyn taýyp jeıtin bolady. Jalpy, munaı óńdeý zaýytynyń qurylysyna merdiger kompanııalardan 3 myńǵa jýyq qurylys mamany tartylmaqshy.
Jańaarqa jeriniń endigide ınvestısııanyń ıgiligin kórip, óńirdegi ındýstrııalyq ólkege aınalaryna degen senim mol.
Qaırat ÁBILDA,
«Egemen Qazaqstan»
Qaraǵandy oblysy
