- Siz birneshe jyl Samaldyń ustazy boldyńyz ǵoı, onyń akterlik qabiletin qalaı baǵalaısyz?
– Samaldyń ózine tán názik súıkimdiligi bar. Jáne onyń boıynda erekshe akterlik qabilet bar. Ol syrt kózge baıqala bermeıdi. Biraq obrazǵa kirip, rólin oınaı bastaǵan sátte siz Samaldy emes, naǵyz keıipkerdi kóresiz. Ol múlde falsh jasaı almaıdy. Dvorsevoı jetistigi men eńbeginiń qupııasy – Samaldyń tabıǵaty men qabiletin dóp tanı alýynda jatyr.
- Samalmen alǵash ret qashan kezdestińiz jáne qandaı áserde qaldyńyz?
– Sergeı bizge ony alyp kelip, maman retinde qarap kórýimizdi surady. Biraq biz ol kezde kýrsty tolyqtaı jınap qoıǵanbyz, sondyqtan qosymsha adam alý múmkin emes edi. Ol óte sabyrly, salmaqty boldy. Men bizdiń bilikti rejısserimiz Evgenıı Kamenkovıchke ótinish jasap, Samaldyń qabiletin baıqap kórýin suradym. Ol qyz sahnaǵa shyqty da, Tatıananyń hatyn oqı jóneldi. Samaldyń ol hatty názik ıirimdermen tebirene, júrekke jetkize oqyǵany sonshalyqty artqy tustan «Men oǵan úılengim keledi» degen Fomenko teatrynyń beldi ártisteriniń biriniń daýsy estildi. Biz bul jaǵdaıǵa rahattana kúlip aldyq. Sodan keıin Kamenkovıch «bizdiń Qazaqstanmen arnaıy kelisimimiz bar. Ol eldiń stýdentteri arnaýly kvotamen oqıdy. Tıisinshe, eshqandaı artyq oryn almaıdy» dedi. Osylaısha, Samal bizdiń kýrsqa túsip ketti.
- Fılmdegi áıel obrazynyń qazylar alqasyn tánti etkeniniń sebebi nede dep oılaısyz?
– Ázirge «Aıka» týyndysyn kórip shyqpadym. Sol sebepti, eshqandaı pikir aıta almaspyn.
– Sergeı nege osy rólge Samaldy tańdady? Bul turǵydaǵy sizdiń jeke pikirińiz qandaı?
– Sergeıdiń bul tańdaýynyń sebebi onyń ózine ǵana aıan dep oılaımyn. Degenmen «Tıýlpan» kartınasynan keıin ekeýiniń shyǵarmashylyq birlestigi damı tústi. Ári Samaldyń qabileti, talanty rejısserge anyq kórindi. «Tıýlpannan» keıin rejısser Samalda úlken potensıal bar ekenin aıqyn túsinse kerek.
- Kann halyqaralyq festıvalinde mundaı bıikti baǵyndyrý – úlken jetistik. Talaılar armandap ótetin shyń. Dál osyndaı tabystan keıin Samaldyń kásibı karerasy qalaı órbýi múmkin?
– Mundaı jetistikke jetkennen keıingi ártistiń taǵdyry boljap bolmaıtyn dúnıe. Áldeqandaı boljam aıtyp, bal ashý óte qıyn. Qalaı bolǵan kúnde de tek kóptegen rólderdi sátti oryndap, jurtshylyqqa odan ári tanyla túsedi dep úmittenemin. Bizdiń Samalmen qarym-qatynasymyz óte jaqsy deńgeıde. Ol jany jaısań, keremet adam. Sabaqty da asa muqııat, joǵarǵy baǵaǵa oqydy. Aıtpaqshy, ol ózin ójet minezdi aktrısa retinde de kórsete aldy. Batyldyq, ójettik adamǵa, onyń ishinde akterge kerek qasıet. Sondyqtan onyń joly – dańǵyl dep úlken senimmen aıta alamyn.
- Samal bilim alǵan, ózińiz qyzmet etetin oqý ordasy týraly aıta ketseńiz?
– Samal bul bilim ordasynda 2007-2011 jyldary oqyp, tálim aldy. GITIS (Teatr óneri memlekettik ınstıtýty) – Reseıdegi eń úzdik teatr ónerin dáripteıtin, úıretetin joǵary oqý oryndarynyń biregeıi. Qazirgi tańda eldegi úzdik teatr oqý oryndarynyń tórttigine kiredi. Al Samal oqyǵan rejıssýra fakýlteti – tipti ańyzǵa aınalǵan orta dese de bolǵandaı. Atalǵan fakýltet qabyrǵasynan talaı myqty akterler men rejısserler túlep ushqan.
Men «Tıýlpan» fılmin óte qatty unattym. Oǵan deıin Dvorsevoıdy bilmeıtin edim. Birinshi fılmdegi Samaldyń jumysy meniń kóńilime ǵajaıyp áser syılady. Ony aýyzben sıpattap jetkize salý qıyn. Jalpy, men Sergeıdi birtýar rejısser dep esepteımin. Men úshin ol – Reseıdegi nómiri birinshi maman. Samaldyń osyndaı sheberdiń qolyna tap bolýy da – úlken baqyt. Degenmen akterdiń ózi yntasyz, qabiletsiz bolsa, rejısserdiń oıyndaǵy dúnıeni alyp shyǵa almaıdy. Bul jerde tandem myqty bolyp tur. Samal – óte eńbekqor jáne shynaıy talant. Bul turǵyda ol kóptegen ártisterden kósh ilgeri alda tur. Osy jetistikten keıin onyń rólderdegi bolmysy odan ári ashyla túsedi, juldyzy jarqyraı túsedi dep senemin. О́zim Samaldyń ustazy bolǵanymdy maqtan etemin.
- Suhbatyńyzǵa rahmet!
Áńgimelesken Abaı Aımaǵambet
