Qyzyljar aýdanynda ornalasqan «Áıteke bı» JShS sımmental tuqymdas atalyq maldardy jalǵa berýmen de aınalysady. Qazir munda 720 bas asyl tuqymdy mal ósiriledi. Árqaısysynyń salmaǵy 900 kıloǵa deıin jetedi. Bordaqylaý kesheninde aldaǵy ýaqytta mal basy eki myńǵa deıin kóbeıtilmek. 7 myńǵa jýyq egistik alqabynyń jartysyna dán sebilipti. Seriktestik dırektory Asqar Mádıevtiń aıtýynsha, satyp alynǵan ár iri qara 170 myń teńge kóleminde sýbsıdııalansa, jalǵa alýshylarǵa 40 myń teńgeden tólenedi. Bul óte tıimdi. Qazir 20-dan astam jalǵa alýshy bar. Osynda agroqurylym jetekshilerimen kezdesken Úkimet basshysynyń orynbasary agroónerkásip salasyn, onyń ishinde mal sharýashylyǵyn qoldaýǵa baǵyttalǵan baǵdarlamalar jóninde áńgimeledi. Aýyl sharýashylyǵyna beriletin demeýqarjy búginde 240 mıllıard teńgeni qurap otyr. Taıaý jyldary aýylsharýashylyq ónimderin 2,5 ese deıin arttyrý mindeti tur. Aldaǵy ýaqytta ótetin Úkimet otyrysynda salany odan ári damytýdyń tyń baǵyttary qabyldanady. Elimizde 16 myń qurylym mal sharýashylyǵymen shuǵyldanady. Olar 100 myńǵa deıin jetkiziledi. Mal bordaqylaý alańdary kóptep ashylady.
«Zenchenko jáne K» komandıttik seriktestiginde 8 myńdaı iri qara maly ósiriledi. 630 adam turaqty jumyspen qamtamasyz etilgen. Seriktestiktiń ónimderi úlken suranysqa ıe. Byltyr 16 myń tonna sút, 935 tonna et óndirilgen. Egistik alqaptar 22 myń gektardy qurasa, 10 myń gektary dándi daqyldarǵa tıesili. Seriktestiktiń mádenıet úıinde ótken keńeste О́.Shókeev agroónerkásip kesheninde memlekettik saıasatty júzege asyrýdyń ilkimdi tetikterin, sondaı-aq tuqym sharýashylyǵyn sýbsıdııalaýdaǵy ózgerister men jańashyldyqtardy tilge tıek etti. 2021 jylǵa taman túgelge derlik joǵary sapaly tuqymmen qamtý belgilengen. Sútti mal sharýashylyǵyn órkendetýge basymdyq beriledi.
Premer-Mınıstrdiń orynbasary «ZIKSTO» kásipornynda bolyp, astyq tasıtyn vagondardyń ereksheligine nazar aýdardy. Buryn shyǵarylyp kelgen vagon-hopper jańalanyp, syıymdylyǵy ulǵaıǵan. Jylyna ekimyń danasyn shyǵarýǵa qabiletti. Al «Qaztehmash» zaýytynda «SAMPO» kombaındary qurastyrylady. Qýattylyǵy 400-500 at kúshine teń 300 kombaındy Ortalyq Azııa men Reseı naryǵyna jóneltý josparlanǵan.
О́mir ESQALI,
«Egemen Qazaqstan»
Soltústik Qazaqstan oblysy
