Sońǵy jyldary sánge aınalǵan óner keskininiń ashylý saltanatyna aýdan ákimi Jarmaǵanbet Aıtýarov, onyń orynbasary Erbolat Mahmýtov, aýdandyq máslıhat hatshysy Abzal sarbalaev, el aǵalary, aýyl turǵyndary jáne atalǵan mekteptiń túlekteri qatysty.
-Qadirli jerlester! Búgin biz ıgilikti istiń kýási bolyp otyrmyz. Elbasy N.Nazarbaev «Bolashaqqa baǵdar: rýhanı jańǵyrý» maqalasynda: «Patrıotızm kindik qanyń tamǵan jerińe, ósken aýylyńa, qalań men óńirińe, ıaǵnı týǵan jerińe degen súısipenshilikten bastalady» degen bolatyn. Aýyl kásipkerleriniń, turǵyndardyń, jastardyń qoldaýymen aýyldarda birneshe áleýmettik nysan salynyp, paıdalanýǵa berildi. Mine, búgin N.Jubaev mektebiniń 2008 jylǵy túlekteri de aýylǵa súıispenshilikterin bildirip, týǵan jerlerin kórkeıtýge atsalysyp otyr. Barsha aýdan turǵyndarynyń atynan sizderge alǵysymyzdy bildirip, 10 jyldyq merekelerińizben shyn júrekten quttyqtaımyn! degen aýdan ákimi Jarmaǵanbet Aıtýarov mektep túlekterine alǵys hat tabystady.
Shetpe selosynyń ákimi Muhtar Mútállapov ıgi isterdiń uıytqysy bolǵan Táýelsizdiktiń qurdastaryna rızashylyǵyn bildirip, jańa qoǵamdyq oryn halyqtyń ıgiligine jaraıtynyna senimdilik bildirdi.
–Mektep bitirgenimizge 10 jyl tolýyna oraı túlekterdiń barlyǵynyń birlese aqyldasýymen aýylǵa álemdegi eń tanymal qalalardan bastaý alyp, bizdiń elde jalǵasqan tájirıbeni júzege asyrýdy jón dep taptyq. Bizdiń oblysymyzdaǵy qala men aýyldarda da beleń alǵan ıgi úrdisti jalǵastyrýymyzǵa aýdan ákimdigi qoldaý kórsetti. «Men óz aýylymdy súıemin» jazýy aýdan jastaryn eljandylyqqa, týǵan jerin qasterleýge úndeıdi degen senimdemin, – dedi Nun Jubaev mektebiniń 2008 jylǵy túlegi Balǵabek Naýryzbaev.
Nun Jubaev mektebiniń bıylǵy túlekteri altyn uıalaryna kerekti qural- jabdyqtarmen qamtamasyz etip, aılardyń sultany, eń qaıyrlysy Ramazan aıynda ortalyq meshitte aýyzashar berdi.
Farıda MUŃALQYZY,
Mańǵystaý oblysy
