Jaz qyzyǵyna engen jurt áýelgide saıabaqtar men sýburqaqtar mańyna qoıylǵan kitap sórelerin tamashalaýǵa kelse, qazir turaqty oqyrmanǵa aınalyp, izdegen týyndylaryn tańdap oqıdy. Oqyrman qajetin óteýge bel sheshe kirisken basqarmanyń qyzmetkerleri arnaıy saýalnama júrgizip, turǵyndardy qyzyqtyratyn ádebıetter tizimin jasapty. Nátıjesinde, Taldyqorǵan qalasy men oblystyń Alakól, Balqash, Eskeldi, Eńbekshiqazaq, Jambyl, Ile, Qaratal, Kerbulaq, Kóksý, Panfılov, Talǵar, Uıǵyr aýdandarynyń turǵyndary úshin ashyq kitap sóreleri uıymdastyrylyp, olarǵa qazaq jáne shetel klassıkteriniń shyǵarmalarymen qatar tanymdyq-psıhologııalyq kitaptar qoıyldy.
– Qazir álem boıynsha kitap oqıtyndar sany azaıdy degen derek bar. Bul tehnologııalyq progrestiń yqpaly shyǵar. Biraq adamdar múldem kitaptan bas tartty deýge bolmas. Oqyrmanǵa jaǵdaı jasaý kerek. Osy maqsatta býkkrossıng formaty keń qoldanysqa enip jatyr. Bul «kitap aınalymy, oqyrmandardyń ózara kitap almasýy» degen uranmen jumys isteıtin joba. Biz de eki jyl boıyna «Jetisý – kitapqumarlar ólkesi» atty shara uıymdastyryp kelemiz. Nátıje jaman emes. О́tken jylǵy esep boıynsha 792 adam oqyǵan kitaptaryn ózara almasqan. Al saıabaqtarda otyryp kitap oqıtyn adamnyń sany tórt júz jıyrma adamǵa jetti, – deıdi Almaty oblystyq Tilderdi damytý basqarmasynyń basshysy Aıdar Bashbaev.
Bıyl da jalǵasyn tapqan jobany kútip júrgenderdiń deni balalar eken. Taldyqorǵan qalasyndaǵy Qaratal ózeniniń jaǵalaýyndaǵy demalys ornyna bara qalsańyz, ashyq kitap sóresinen tańdaǵan kitabyn alyp, qunyǵa oqyp otyrǵan jasóspirimderdi kezdestiresiz.
– Bizdiń mamandar oqyrmandar arasynda saýalnama júrgizip, qandaı taqyryptaǵy týyndylarǵa suranys baryn zerttep kórdi. Basqarma kópshilikti qyzyqtyrǵan kitaptarǵa qarjy bóldi. Qazir alynǵan kitaptar qoljetimdi sórelerde tur. Sharaǵa oqyrmandar ǵana emes, kitap syılaýshylar da belsene atsalysýda. Taldyqorǵan qalasynyń turǵyndary tarapynan 56 kitap syıǵa aldyq. Bıyl joba aıasy keńeıdi. Aýdan ortalyqtaryndaǵy kórneki jerlerge ashyq kitap sórelerin qoıdyq. Qapshaǵaı, Tekeli qalalarynyń kóshelerinde de oqyrmandarǵa arnalǵan kitap sóreleri ashyldy, – dedi bizge basqarma basshysy Aıdar Bashbaev.
Qalmahanbet MUQAMETQALI,
«Egemen Qazaqstan»
Almaty oblysy
