Qostanaı qalalyq ardagerler keńesiniń tóraǵasy, ózi qyzmet etken Qostanaı oblysy boıynsha Qylmystyq atqarý júıesi bastyǵynyń orynbasary, ádilet polkovnıgi Bolat Baıjanov, QR IIM Shyraqbek Qabylbaev atyndaǵy Qostanaı akademııasy bastyǵynyń orynbasary, polısııa polkovnıgi Erbol Qappasov jáne Qostanaı qalasy ákimdiginiń qyzmetkerleri ardagerdiń úıine kelip, ony jáne otbasyn erekshe qýanyshymen quttyqtady.
«Qurmetti Mıhaıl Stepanovıch! Sizdiń ómirińiz keıingi urpaqqa ónege, keler urpaqqa umytylmas tarıh bolaryna kámil senemiz. Sizdiń surapyl soǵystaǵy erligińiz tarıhta altyn árippen jazyldy. Osyndaı baqytty ǵumyryńyz bar sizge zor densaýlyq tileımiz, jan jaryńyz Anna Petrovnamen baqytty ómir súre berińiz», dedi polısııa polkovnıgi Erbol Qappasov.
Mıhaıl Stepanovıch 1941jyldan 1944 jyl aralyǵynda Uly Otan soǵysyna qatysyp, birneshe ret erlik kórsetken. Soǵys aıaqtalǵan soń 1948 jylǵa deıin Qaraǵandy qalasynda áskerı tutqyndar úshin lager basqarmasynda nusqaýshy qyzmetin atqarǵan. 1949 jyly Qaraǵandydaǵy tutqyndarmen jumys istegen. Ol 1963 jyly Qostanaı oblysyna qyzmetke aýysyp, Qusmuryn stansasyndaǵy kolonııada jedel jáne rejım jumysy boıynsha bastyqtyń orynbasary boldy. Mıhaıl Kondratenko qyzmetin jaqsy jáne adal atqarǵany úshin tárbıe jumysynyń úzdigi belgisimen birneshe ret marapattalǵan, «Qyzyl juldyz» ordeni, «Stalıngradty qorǵaǵany úshin», «Jeńistiń 20 jyldyǵy» medalderi jáne «XXX Keńes áskeri jáne floty», «Minsiz qyzmeti úshin 1-dáreje» jáne basqa da kóptegen marapattary bar. 1971 jyly Qostanaı oblysy 52-ETK bastyǵynyń orynbasary mindetinen zeınetke shyqty.
Basynan ótken qıyndyqtarǵa qaramastan, zaıyby Anna Petrovnamen ul men qyz ósirip, qazirgi ýaqytta nemere jáne shóberelerdiń atasy. Bir ǵasyr jasaǵan qarııa áli de tyń, ótken ómir estelikterin umytpaǵan. Búgingi urpaqtyń baqytty bolýyn tileıdi.
«Balalar qazir jaqsy zamanda ómir súrip jatyr. Tek eńbek etip, Otanǵa adal qyzmet etýi kerek, sonda el de, memleket te myqty bolady», dedi ǵasyr jasaǵan aqsaqal.
Názıra Járimbet
«Egemen Qazaqstan»
Qostanaı
