О́tkenniń bárin mansuqtaı berý durys emes. Keńes odaǵy kezinde jas órenderdi beıimdilikterine qaraı túrli salalarǵa daıyndaıtyn «Jas tehnık» sııaqty úıirmeler kóp bolatyn. Birin-biri qolǵaptaı tez aýystyrǵan «reformator» Bilim mınıstrleri sheteldiń qańsyǵyna tańsyq bolyp, oqý baǵdarlamasyna jańalyq tyqqyshtap júrip osy jaqsy dástúrdiń sabaqtastyǵyn umytqan edi. «Jas tehnık» jetile kele «Jas ǵalym» baǵdarlamasyna ulasyp, qanshama jańashyl izdenisterge jol ashatyn. О́nertapqyshtar kóbeıetin.
Sol jaqsy úrdistiń aldy Qyzylorda oblysynda iske asyp jatyr.
Eralıev Serikbol degen jas kásipker qalada «Smart Generation» robototehnıka mektebin ashty.
Serikbol kez kelgen adamnyń tisi bata bermeıtin salaǵa joldan qosylǵan kók atty emes. Ol buǵan deıin qaladaǵy qosymsha bilim berý oqý-ádistemelik ortalyǵynda robototehnıka ortalyǵynda jetekshi bolyp jumys jasaǵan.
Mektep aqyly negizde. Aptasyna tórt saǵattan oqytatyn arnaýly mektepke balalar alty jastan bastap qatysa alady. Al, múmkindigi shekteýli jasóspirimderge tegin oqytý usynylady.
Jas kásipker jańa mektepke 2,4 mln. teńge jumsaǵan. Onyń 500 myń teńgesin «Samruk-Kazyna Trust» áleýmettik jobalardy damytý qorynyń baıqaýynda jeńip alǵan.
– Mektepti zaman talabyna saı ashyp otyrmyz. Robototehnıka salasy óte qarqyndy damyp kele jatyr. Zaman suranysy aqparattyq tehnıka salasynyń mamandary deıtin bolsaq, bul mamandardy qazir daıyndamasaq kesh bolady. Mektepke qajetti qural-jabdyqtardy ár elden jınaqtadyq. Máselen, keıbir quraldar Danııa memleketinen aldyryldy. Sol sııaqty qajetti zattardy Reseıden, Qytaı, Almaty, Astanadan aldyq. Mektepti ashqannan keıin keshendi jasaǵan jón. Sondyqtan da materıaldyq bazanyń tolyq bolýyna kóńil bóldik, – deıdi Serikbol Eralıev.
Mekteptiń ashylý saltanatyna Kásipkerler palatasynyń dırektory Ǵalymbek Jaqsylyqov arnaıy kelip, quttyqtaý sózin aıtty.
– Qazirgi sıfrlanǵan qoǵamdy aqparattyq tehnologııa mamandarynsyz elestetý múmkin emes. Búgingi kásipkerlikke qadam basqan Serikbolmen kóktemde tanystyq. Sol kezde qalada robototehnıka mektebin ashqysy keletinin aıtqan bolatyn. Ras, ınnovasııalyq jobalar baıqaýyna qatysqanymen, jobasy jeńiske jete almady. Degenmen, «qamyqpa, isińdi tastap ketpe» dep keńesimdi berdim. Búgingi mektebiniń ashylý saltanatyna shaqyrǵanda kelýge qýana kelistim. Aıadaı ǵana bólme dep jas kásipkerdi synaı kórmeńizder. Bul shaǵyn bólmedegi jas búldirshinderdiń qýanyshyn, ata-analarynyń qyzyǵýshylyǵyn kórip otyrsyzdar. Kúni erteń osy búldirshinderdiń arasynan elimizge paıdasy tıetin mamandar ósip shyǵady. Biz de óz tarapymyzdan qarap qalmaımyz. Qoldan ne kómek kerek, berýge ázirmiz», – dedi ol.
Zaman – bilimdiniki. Sandyq tehnologııa jańa maqsattarǵa qulash urǵyzyp jatyr. Eldiń erteńin eńseli etetin keleshekke jańa mektep osylaısha qazyǵyn qaqty.
Baqtııar TAIJAN,
«Egemen Qazaqstan»
Qyzylorda oblysy.
