Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen «Oralman» kórkem fılmi Ulttyq kınematografııa óneri men ǵylymdary akademııasynyń barlyq múshesi qatysqan jabyq daýys berý qorytyndysy boıynsha úzdik fılm dep tanyldy. Odan bólek, fılmniń rejısseri Sábıt Qurmanbekov úzdik rejısser, al basty róldi somdaǵan akter Dýlyǵa Aqmolda úzdik akter atandy. Sondaı-aq «Úzdik ssenarıı» atalymy boıynsha fılmniń ssenarıı avtorlary Nurlan Sanjar men Sábıt Qurmanbekov marapattaldy. «Úzdik sýretshi» júldesi fılmniń qoıýshy sýretshisi Rýstam Odınaevqa tabystalsa, «Úzdik kompozıtor» júldesi «Oralman» fılminiń mýzykasyn jazǵan Aıdos Saǵatovqa buıyrdy.
Kınematografııa salasyndaǵy ulttyq «Tulpar» júldesin otandyq kınematografty qoldaý, mádenı erekshelikti jáne ulttyq kınoındýstrııa negizin saqtaý, jergilikti jáne halyqaralyq jurtshylyq arasynda qazaqstandyq úzdik jumystardy nasıhattaý maqsatynda qurylǵan bolatyn. Atalmysh júlde – kınematografııanyń jáne otandyq kınonyń damýyna úles qosqan jetistikteri úshin kıno salasy mamandaryna beriletin kásibı marapat.
Bıyl «Tulpar» júldesinde 2017 jyldyń 1 qazany men 2018 jyldyń 30 qyrkúıegi aralyǵynda kórermen nazaryna usynylǵan, sonymen qatar prokatqa shyǵýǵa josparlanǵan qazaqstandyq kórkem, derekti jáne anımasııalyq fılmder irikteýden ótti.
HH ǵasyrdyń 30-shy jyldary qyzyl ásker jendetteriniń qysymynan týǵan jerin tastap, Aýǵanstanǵa qonys aýdarýǵa májbúr bolǵan qazaq otbasynyń arada ótken sandaǵan jyldyq úzilisten keıingi elge oralý tarıhy men talaıly taǵdyry baıandalatyn fılm óziniń mazmundyq máni men kórkemdik deńgeıiniń joǵarylyǵyn ár ýaqytta dáleldep keledi. Atap aıtar bolsaq, kınotýyndy buǵan deıin Irannyń astanasy Tegeranda ótken 35-shi halyqaralyq Fadjr kınofestıvali men XIII halyqaralyq «Eýrazııa» kınofestıvaliniń bas júldesin jeńip alǵan bolatyn. Fılmde basty róldi somdaǵan akter Dýlyǵa Aqmolda qyrkúıek aıynda Tatarstanda ótken XIII halyqaralyq musylmandar kınosy festıvalinde «Úzdik er adam róli» júldesimen marapattaldy. Sondaı-aq kartına Italııada ótken HH halyqaralyq «Religion Today» kınofestıvalinde «Úzdik fılm» atalymynda jeńiske jetip, táýelsiz SIGNIS qazylar alqasynyń arnaıy júldesin ıemdendi. Odan bólek, Germanııada ótken 66-shy halyqaralyq Mangeım-Haıdelberg kınofestıvalinde «Oralman» fılmi úzdik jetistikteri úshin arnaıy júldemen marapattalsa, aqpan aıynda Nepalda ótken 22-shi halyqaralyq kınofestıvalde «Sheteldiń úzdik fılmi» júldesin qanjyǵasyna baılaǵan bolatyn. Al osy jyldyń sáýir aıynda Bishkekte ótken «Aq Ilbiris» ulttyq kınojúldesiniń qos birdeı marapatyna qol jetkizdi: fılm «Ortalyq Azııanyń úzdik fılmi» júldesimen, al kartınada basty róldi somdaǵan akter Dýlyǵa Aqmolda «Ortalyq Azııanyń úzdik akteri» júldesimen marapattaldy.
Nazerke JUMABAI,
«Egemen Qazaqstan»
