Jýyrda elimizdiń atynan alǵash ret qatysqan belgili sángerdiń «Kóktem-jaz – 2019» atty maýsymdyq kolleksııasy Italııanyń Mılan qalasynda ótip jatqan «Milan Fashion Week» sán aptalyǵynyń resmı baǵdarlamasynda kórsetildi.
Taraz qalasy týraly aıtylǵanda, áýeli áıgili shyǵys aqyndarynyń ejelgi Taraz arýlaryna arnaǵan ǵazaldary oıǵa oralady. Shaıyrlardyń júregin terbegen arýlar týraly ańyz Taraz topyraǵynda áli kúnge deıin aıtylady. Sol sebepten de Aıdarhan Qalıev óz kórsetilimin «Taraz perishteleri» dep atapty. Munda shyǵarmashylyq kórsetilimniń sımvoly perishte bolyp belgilengen. «Shyǵys sulýlarynyń qupııaǵa toly kelbeti men beınesi perishteni eske salmaı qoımaıdy», deıdi sángerdiń ózi.
Negizinen Mılanda kórsetilgen sán úlgileri shyǵystyq stılde daıyndalǵan. Sonymen qatar, sánger qolóner sheberleri bezendirgen jyltyr matalardy paıdalanǵan. Jalpy, shyǵys uǵymynda qyz balasy náziktik pen páktiktiń sımvoly retinde beınelense, áıel beınesi asyl jar, aıaýly ananyń sımvoly ispettes. Sondyqtan da sánger sán úlgilerine aq tústi qoldanǵan.
Búginde úlken jetistikke jetken Aıdarhan Qalıevtiń kolleksııalary bıylǵy jylǵy 8-11 qazan aralyǵynda tuńǵysh ret Taraz qalasynda ótetin «Taraz – Aspara fashion week» sán aptalyǵynyń ashylý saltanatynda kópshiliktiń nazaryna usynylady. Kezinde uly Jibek jolynyń ortalyǵy bolǵan Taraz qalasynda ótetin sán aptalyǵyna Italııa, Úndistan, Gollandııa, Reseı, Qytaı, Fransııa sııaqty 18 memleketten qonaqtar keletin bolady. Sonymen qatar, qurmetti qonaqtar qatarynda Qazaqstan Respýblıkasynyń Memlekettik hatshysy Gúlshara Ábdihalyqova men О́zbekstan Respýblıkasy Premer-Mınıstriniń orynbasary, Áıelder komıtetiniń tóraıymy Tanzıla Narbaeva da bolady dep josparlanýda.
Aıta keteıik, sán aptalyǵynda tanymal sángerlerdiń kórsetilimderinen basqa, 30 halyqaralyq dızaınerdiń kıimderi usynylady. Sonymen qatar, «Aspara Fashion Week» aıasynda halyqaralyq dızaınshylar konkýrsy ótedi. Tórt kúnge sozylatyn sharanyń alǵashqy kúni tarazdyqtar Parıj jáne Italııa dızaınerleriniń kıimderin tamashalaı alady. Al ekinshi kúni ózbekstandyq 6 dızaınerdiń óneri kópshilik nazaryna usynylsa, úshinshi kúngi kórsetilimdi Italııa jáne Fransııa dızaınerleri aıaqtaıdy dep kútilýde. Jambyl oblystyq týrızm basqarmasynyń málimetinshe, atalǵan sán aptalyǵyna úsh myńǵa jýyq týrıst tartylady. Nátıjesinde álemniń kóptegen elinen kelgen qonaqtar Taraz tarıhymen tanysyp, taǵylymdy oı túıip qaıtady.
Hamıt Esaman,
«Egemen Qazaqstan»
Jambyl oblysy
