Mınıstrdiń aıtýynsha, elimzdiń birneshe óńirinde — Almaty, Astana qalalarynda, Pavlodar, Qaraǵandy oblystarynda saýda ortalyqtary men bazarlarǵa tekserýler júrgizilip, urlanǵan zattardyń satylýyna qatysty problemanyń bar ekeni rastaldy.
«Urlanǵan zattar satylǵan. Kóbi saýda oryndarynda qujattary joq telefondar men onyń bólshekterin satqan. Búgin Almaty q. ákimi bir bazardyń jabylǵanyn aıtty. Osyndaı bazarlarǵa, saýda ortalyqtary men dúńgirshekterdiń ıelerine qatysty barlyq sharalar qabyldanýy tıis», — dedi Q. Qasymov.
Atap aıtqanda, uıaly telefondar boıynsha qazir sáıkestendirý sharalary qabyldanatyn bolady. Nátıjesinde Qazaqstanda JSN men tólqujat derekterin engizbeı urlanǵan telefondy qosý múmkin bolmaı qalady.
Q. Qasymovtyń aıtýynsha, búgingi tańda Qazaqstanda urlanǵan telefondardyń 85-87% qosylady. Bul telefondardy retteýge qatysty tıisti tártiptiń joqtyǵynan. Júrgizilgen saraptaýlar olardyń az bóligi QHR, Reseı, О́zbekstan men Qyrǵyzstanǵa áketiletinin kórsetti.
Q. Qasymov sonymen qatar urlanǵan telefondardy el aýmaǵynan shyǵarý prevensııalary boıynsha josparlary týraly aıtty.
«Endi urlanǵan telefondar shetelderde satylady. Biz bul jumysty bilemiz, júrgizip otyrmyz. Qazir aldyn-alý sharalaryn qabyldap jatyrmyz. Biz qaı jerde, qaı elde bizdiń elde urlanǵan telefon qosylyp, jumys istep turǵanyn kórsetetin baǵdarlamany iske qosatyn bolamyz», — dedi mınıstr.
Q. Qasymov aıtyp ótkendeı, baǵdarlama pılottyq rejımde jumys istep tur. Onyń ereksheligi, basqa memlekettermen ózara árekettestikte jumys isteıtindiginde.
Eske salaıyq, búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda jergilikti polısııanyń óńirlerdegi qoǵamdyq qaýipsizdikti qamtamasyz etý boıynsha jumys tıimdiligi máselesi qarastyryldy.
Bıyl 12 shildede ishki ister organdarynyń qyzmetterin jetildirýge baǵyttalǵan zańdardyń biri qabyldandy. Zańmen ishki ister departamentteri polısııa departamentteri bolyp qaıta quryldy, al Jergilikti polısııa qyzmeti burynǵy mindetteri men fýnksııalaryn saqtaı otyryp, qurylymdyq bólimshe quqyǵymen olardyń quramyna engizildi.
Endi ákimderge polısııa departamentteriniń bastyqtaryn qyzmetine taǵaıyndaý jáne bosatý (ishki ister mınıstriniń usynýy boıynsha) quqyǵy jáne polısııa organdarynyń aldyna polısııanyń jedel-izdestirý jáne prosessýaldyq qyzmetine aralasýsyz, quqyqtyq tártip pen quqyq buzýshylyqtar profılaktıkasyn qamtamasyz etý boıynsha mindetterdi qoıý ókilettilikteri berilgen. Sondaı-aq polısııa departamentteriniń basshylary zańnamalyq turǵyda ákimder men halyq aldynda jylyna bir retten kem emes esep berýge mindettelgen.
