Nursultan Nazarbaev Qazaqstan men Armenııa arasyndaǵy yntymaqtastyqtyń joǵary deńgeıde ilgerilep kele jatqanyna toqtalyp, ony keńeıtýdiń áleýeti jetkilikti ekenin atap ótti.
– Qazaqstan Armenııamen árdaıym jaqsy qarym-qatynasta boldy. Elderimiz arasyndaǵy saýda aınalymy byltyr 60 paıyzǵa jýyq ósti. Bul úrdis qazir de jalǵasyn taýyp otyr. Munymen shektelmeıtinimizdi atap ótkim keledi. Úkimetterimiz eki jaqty baılanystardy nyǵaıtý úshin kúsh jumyldyrýy kerek. Bizdiń kompanııalarymyz eki eldiń de ekonomıkasyna ınvestısııa quıa alady, – dedi Qazaqstan Prezıdenti.
Memleket basshysy eńbek mıgrasııasy máselelerine jáne eki el kásipkerleri arasyndaǵy baılanystardy keńeıtý qajettigine toqtalyp, ol úshin tıimdi jaǵdaı jasalǵanyn atap ótti.
N.Pashınıan Nursultan Nazarbaevqa kezdesýge jáne memleketaralyq baılanystardy odan ári nyǵaıtý isindegi mańyzdy máselelerdi talqylaýǵa múmkindik týǵyzǵany úshin rızashylyq bildirdi.
– О́zara yqpaldastyǵymyz oń qarqyn alyp otyrǵanymen erekshelenedi. Onyń odan ári osylaı ilgerileı beretinine senimdimin. Biz úshin Qazaqstanmen aradaǵy baılanys óte mańyzdy. Ekonomıka sektoryndaǵy qatynastardy, sonyń ishinde ınvestısııalyq yntymaqtastyqty damyta túsemiz dep úmittenemiz, – dedi Armenııa Premer-Mınıstri.
Sonymen qatar, N.Pashınıan Qazaqstan men Armenııa arasyndaǵy yntymaqtastyqty halyqaralyq uıymdar aıasynda nyǵaıtýdyń mańyzdy ekenin atap ótti.
