Oblys ákiminiń birinshi orynbasary Serik Shapkenov: «Bul jerde attary dúnıe júzine áıgili kompanııalar jumys istegenderimen, jergilikti kásipkerlerdiń taýarlary men qyzmetterin paıdalanýǵa múddeli emes», - dep ashyq aıtty. Mysaly, Teńiz kenishinde bir vahtalyq aýysymda 50 myń adam eńbek etedi. Al olarǵa azyq retinde beriletin taýyq eti shekara asyp Polshadan keledi. Sebep- bizdiń et eýrostandartqa saı emes eken. Osy olqylyqtyń ornyn toltyrý úshin jergilikti atqarýshy bılik standartqa sáıkestendirip qus fabrıkasyn salýdy, sosyn munaıshylarǵa jergilikti ónimdi berýdi usynǵan, alaıda fabrıka iske qosylǵan kúnniń ózinde onyń etiniń ótýine kepildik joq. «Sondyqtan, aldymen qazaqstandyq ónimdi alyp, jetkiliksiz bolǵan jaǵdaıda ǵana shetten tasymaldaıtyndaı etip zańǵa ózgeris engizý kerek», - deıdi Serik Shapkenov.
Oblystyq kásipkerler palatasynyń basshysy Abdolla Ydyrysovtyń aıtýynsha, otandyq taýaróndirýshiler ónimderin «NADLoC» platformasyna, memlekettik satyp alý portalyna usyna alady. Alǵa qaraı TKSh Komıteti bazasy men otandyq taýaróndirýshiler reestryn biriktirý josparda bar, sol arqyly jobalaýshylar jergilikti taýarlar tizimimen jobalaý satysynda tanysady. Al palata basshysynyń orynbasary Serik Sársekenovtiń oıynsha, satyp alýlardy ótkizgen kezde qazaqstandyq qamtý kólemin zań júzinde bekitý kerek. Qazir aýyl sharýashylyǵynda paıdalanylatyn tehnologııanyń 90 prosenti shetelden alynady, «Al ony ózimiz de shyǵara alamyz», - deıdi maman.
Aımaqtaǵy bıznes ıeleri kásipkerler quqyn qorǵaý, monopolısterge qatysty zań jóninde de oılaryn ortaǵa saldy. Elbasy Joldaýynda kórsetilgen maqsattardy jurtshylyqqa túsindirý úshin qurylǵan aqparattyq top quramyndaǵy depýtattar kezdesýde aıtylǵan máselelerdi Úkimetke jetkizetinderin aıtyp tarasty. Bıylǵy Joldaýda da bıznesti damytýǵa baǵyttalǵan jumystar anyq kórsetilgen, bul atyraýlyq kásipkerlerge de senim berip otyr.
Baqytgúl BABASh,
«Egemen Qazaqstan»
ATYRAÝ
