Foto: Orynbaı BALMURAM
Búgin elordada «Almatydan bastalǵan densaýlyq saqtaý qyzmetterimen jappaı qamtýǵa jáne turaqty damý maqsattaryna» taqyrybymen medısınalyq-sanıtarııalyq alǵashqy kómek boıynsha jahandyq konferensııa bastalǵan bolatyn. Almaty deklarasııasynyń 40 jyldyǵyna arnalǵan alqaly jıynǵa álemniń 140 elinen 1700 delegat qatysýda. Osy álemdik basqosý aıasynda uıymdastyrylyp, uzaq ómir súrý men densaýlyqty qorǵaýda salaýatty ómir saltyn saqtaýdyń mańyzdylyǵyn nasıhattaýdy kózdegen aksııaǵa konferensııa qonaqtarynan bólek, 800-den asa qala turǵyny jáne kúni keshe elimizdiń eń alǵashqy «Densaýlyq elshileri» ataǵyn alǵan grek-rım kúresi boıynsha Olımpıada chempıony Iýrıı Melnıchenko, Gınnes rekordtar kitabyna rekordy 7 ret engen, álemdegi eń úlken shólderdi júgirip ótken marafonshy Marat Jylanbaev jáne «Sparta-Astana» KTK tobynyń kapıtany Danııar Jumadilov jáne basqalary qatysty. Marafon 1 km jáne 3 km qashyqtyqty júgirip ótti.
Aksııanyń ashylý saltanatynda Densaýlyq saqtaý mınıstri E.Birtanov sóz sóıledi. «Dúnıejúzilik densaýlyq saqtaý uıymy salaýatty ómir saltyn nasıhattaýǵa erekshe kóńil bóledi. Sondyqtan biz de osy qaǵıdadan aýytqymaǵanymyz abzal. Eger ózimizdiń densaýlyǵymyzdy qorǵaýǵa tyryspaıtyn bolsaq, onda ózimizge, otbasymyzdyń bıýdjetine aýyrtpalyq túsiremiz. Qazir fıtnes-ortalyqtarda ár adam óziniń maqsatyna qaraı jattyǵý jasaı alatyndaı jaqsy nusqaýshylar bar. Meniń oıymsha bul óte qoljetimdi. Alaıda, durys tamaqtanbaıynsha onyń nátıjesin kórý múmkin emes. Durys tamaqtanbaý tuzdy, táttini kóp tutynýdan bastalady. Sondyqtan mamandardyń usynymdaryn oryndaýǵa tyrysamyn jáne ony sizderge de usynamyn», dedi mınıstr.
Dúnıejúzilik densaýlyq saqtaý uıymy bas dırektory Tedros Gebreıesýs halyq densaýlyǵyn qorǵaýda jáne jurtshylyqty salaýatty ómir saltyn saqtaýǵa shaqyrýda atalǵan aksııanyń máni erekshe ekenin atap ótti. Al IýNISEF Balalar qorynyń Eýropa jáne Ortalyq Azııa boıynsha óńirlik dırektory Afshan Han semizdik, qant dıabeti, depressııa jáne júrek-qan tamyrlary aýrýlary sııaqty juqpaly emes aýrýlardyń aldyn alý jáne ony azaıtýdyń birden-bir joly fızıkalyq belsendilikti arttyrý ekenin aıta kelip, álemde semizdik aýrýyna shaldyqqan adamdardyń sany 1975 jyldan 2016 jylǵa deıin 11 mıllıonnan 124 mıllıonǵa deıin artqanyn jetkizdi.
DSM Qoǵamdyq densaýlyq saqtaý ulttyq ortalyǵynyń dırektory Ýálıhan Ahmetov qatysýshylarǵa belsendiligi, salaýatty ómir saltyna ustanymdary jáne qyzyǵýshylyǵy úshin alǵys bildirip, 5 jastan bastap 17 jasqa deıingi árbir bala kúndelikti 1 saǵat, al 18 jastan asqan eresek adam kúndelikti kem degende jarty saǵat nemese aptasyna 150 mınýttan 300 mınýtqa deıin dene jattyǵýymen aınalyssa densaýlyqtary nyǵaıyp, ınfarkt, ınsýlt, dıabet, qaterli isik jáne taǵy basqa da aýrýlardyń aldyn alýǵa bolatynyn aıtty.
Maıgúl SULTAN,
«Egemen Qazaqstan»
Sýretti túsirgen Orynbaı BALMURAT
