О́nerkásipti sıfrlandyrýǵa arnalǵan forýmǵa Aqparat jáne kommýnıkasııalar mınıstri Dáýren Abaev, Qazaqstandaǵy Fransııanyń tótenshe jáne ókiletti elshisi Fılıpp Martıne, TOTAL kompanııasynyń Qazaqstandaǵy basqarýshy dırektory Paskal Brean qatysty. Sondaı-aq fransýz kásipkerleri men sarapshylar, elimizdegi memlekettik organdar men kommersııalyq uıym ókilderi jınaldy.
Jıyndy ashqan Fılıpp Martıne sıfrlandyrý jobalary boıynsha fransııalyq kásiporyndary Qazaqstanda jumys isteýge daıyn ekenin aıtty. «Bul forým - Astanadaǵy «Sıfrly kúzdiń» mańyzdy sharasy. Jıyn sońǵy ınnovasııalardy eskere otyryp, basqarý, ındýstrııalandyrý, bilim berý, densaýlyq saqtaý jáne qarjy taqyryptaryn talqylaýǵa múmkindik beredi», - dedi ol.
«Fransııada 2022 jylǵa deıin barlyq ákimshilik qujattardy tolyqtaı sıfrlandyrý kózdelip otyr. Iаǵnı Fransııa men Qazaqstannyń maqsat-múddeleri bir. Sondyqtan sıfrly tehnologııanyń túrli máseleleri talqylanatyn búgingi forým eki el úshin de óte mańyzdy», dedi F.Martıne.
Forýmda elimizdiń Aqparat jáne kommýnıkasııalar mınıstri Dáýren Abaev Fransııanyń jańa tehnologııalar boıynsha Eýropadaǵy kóshbasshy memleket ekenin atap ótti.
«Qazaqstan men Fransııa 26 jyl ishinde tyǵyz jáne strategııalyq ózara qarym-qatynas ornatty. Jaqynda ǵana eki eldiń Memleket basshylary N.Nazarbaev pen E.Makronnyń kezdesýi ótti. Bul da ekijaqty qarym-qatynastyń damýyna erekshe serpin beredi. Ásirese, jańa tehnologııalar, IT-jobalar salasynda ekonomıkalyq qarym-qatynastardy damytýǵa bolady. Sebebi Fransııa – jańa tehnologııalar boıynsha Eýropadaǵy kóshbasshy el», - dedi ol.
Mınıstr óz sózinde osy saladaǵy Fransııamen yntymaqtastyq ornatýdyń Qazaqstan úshin tıimdiligine toqtaldy. Sondaı-aq «Sıfrly Qazaqstan» baǵdarlamasynyń maqsaty jaıly atap ótti. «О́tken jyldyń sońynda Elbasy Nursultan Nazarbaev aýqymdy «Sıfrly Qazaqstan» baǵdarlamasyna qol qoıdy. Bul baǵdarlama ınnovasııalyq jáne IT-jobalardy nasıhattaýdyń irgetasy bolmaq. Mınıstrlik eń aldymen ınfraqurylym úshin jaýap beredi, sondyqtan sizdermen birlesip jumys isteýge ázirmiz», dedi Dáýren Abaev.
Forýmda «IDEMIA» kompanııasynyń vıse-prezıdenti Izabel Lozon «e-Estonııa, Elektrondyq úkimet is júzinde» atty kitapqa qysqasha sholý jasap, sıfrly tehnologııalardyń tıimdi tustarymen bólisti. Onyń aıasynda ENA memlekettik basqarý ulttyq mektebiniń ınnovasııa boıynsha ókili Fransýa Vaıntrop Fransııada sıfrly tehnologııalardy engizý barysynda kezdesken qıyndyqtarymen bólisti.
Aqparat jáne kommýnıkasııalar vıse-mınıstri Daryn Tuıaqov Qazaqstanda júzege asyrylyp jatqan «Sıfrly Qazaqstan» baǵdarlamasynyń qalaı júzege asyrylyp jatqanyna toqtaldy.
«Sıfrly Qazaqstan» baǵdarlamasyn jasaqtaý barysynda ekonomıka salalaryn sıfrlandyrý, sıfrly memleket, Digital silk way, adamı kapıtaldy damytý men ınnovasııalyq ekojúıeni qurý syndy negizgi bes baǵytqa basymdyq berilgen. 2025 jylǵa deıin «Sıfrly Qazaqstan» baǵdarlamasynan kútip otyrǵan ekonomıkalyq tıimdilik 1,7 -2,1 trln teńge aralyǵynda bolýǵa tıis. Eńbek ónimdiligi taý-ken óndirisi salasynda - 38,9 %, qaıta óńdeý salasynda - 49,8% artady dep kútilýde», dedi ol.
Forým sıfrly tehnologııalardyń memlekettik qyzmettegi múmkindikteri, Indýstrııa 4.0, bilim berý men densaýlyq salasyndaǵy baǵyttary men múmkindikteri týraly paneldik sessııalarǵa ulasty.
Mádına JÁLELQYZY,
«Egemen Qazaqstan»
