Forýmnyń maqsaty – Elbasy usynǵan rýhanı jańǵyrý konteksinde Eýrazııa halyqtarynyń tarıhy, mádenı dástúrleri men rýhanı muralary máselelerin zertteý jáne ózektendirý. Jıynǵa otandyq jáne sheteldik ǵalymdar men Reseı, Bolgarııa, О́zbekstannan kelgen sarapshylar qatysyp, oramdy oılary men paıymdy pikirlerin ortaǵa saldy.
«Bul forým dástúrli túrde ótkizilýimen jáne ǵylym salasynda eleýli eńbek etip júrgen ǵalymdardyń basyn qosýymen erekshelenedi. Dástúrli dep ataýymnyń da syry bar, sebebi bıyl HV márte uıymdastyrylyp otyr. Otandyq jáne sheteldik ǵalymdar jıylǵan búgingi basqosýdyń mańyzy zor. Sonymen qatar shara aıasynda «Gýmılev oqýlary» da uıymdastyrylady.
Eýrazııalyq ǵylymı forým oqý-ádistemelik emes, sonymen qatar ǵylymı-tájirıbelik baǵytty da ustanady. Sondyqtan da osy kúnderi Qazaqstan tarıhshylarynyń VI kongresi ótip, sonyń aıasynda, Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynyń negizinde jaryq kórgen birneshe kitaptyń tusaýkeseri ótkiziletinin aıta ketken abzal. Osy ispetti mańyzdy máslıhattar Eýrazııa halyqtarynyń tarıhy men tamyryn tanyp-bilýge, halyqtar dostyǵyn nyǵaıta túsýge serpin bereri sózsiz», dedi L.N.Gýmılev atyndaǵy EUÝ rektory, UǴA akademıgi Erlan Sydyqov.
Erlan Báttáshuly tizginin ustaǵan jıynda tarıh ǵylymdarynyń doktory, professor, Á.Marǵulan atyndaǵy Arheologııa ınstıtýtynyń Astana qalasy fılıalynyń bas ǵylymı qyzmetkeri, German arheologııa ınstıtýynyń korrespondent-múshesi Zeınolla Samashev «Erte saq mádenı kesheniniń qalyptasýy», Memleket tarıhy ınstıtýtynyń dırektory, tarıh ǵylymdarynyń doktory, professor Búrkitbaı Aıaǵan «Qazaq memlekettiliginiń tarıhy týraly jańa derekter: Ábilhaıyr Shaıbanı qozǵalysynyń baǵyty» taqyrybynda baıandama jasady. L.N.Gýmılev atyndaǵy EUÝ Qazaqstan halqy Assambleıasy kafedrasynyń meńgerýshisi, ekonomıka ǵylymdarynyń doktory, professor Anatolıı Bashmakov «Qazaqstannyń ózindik áleýeti jáne qoǵamdyq sanany jańǵyrtý: sınergııanyń áseri» jóninde áńgime órbitse, Sh.Ýálıhanov atyndaǵy Tarıh jáne arheologııa ınstıtýtynyń dırektory, tarıh ǵylymdarynyń doktory, professor Zııabek Qabyldınov «HVIII- HH ǵǵ. Otan tarıhynyń ózekti máseleleri» taqyrybynda sóz sóıledi.
Sondaı-aq Bolgarııadan kelgen professor Kamen Velıchkov «Jan-jaqtylyqtyń birlik prınsıpi: eýropalyq úlgi» taqyryby tóńireginde baıandasa, Reseıden kelgen tarıh ǵylymdarynyń kandıdaty, Novosibir memlekettik ýnıversıtetiniń dosenti Oleg Mıtko «Bizdiń dáýirimizdegi birinshi myńjyldyqtyń birinshi jartysynyń sońyndaǵy altaılyq taıpalardyń Shyǵys Eýropa dalasyna qonys aýdarýynyń arheologııalyq dálelderi» taqyrybynda tartymdy áńgimeledi.
Forým aıasynda jeke baǵdarlama boıynsha ózge de sharalar ótip, ǵalymdar seksııa májilisterinde baıandamalar jasady.
Ularbek NURǴALYMULY,
«Egemen Qazaqstan»
