Ekinshi iri jeńisine jetti
Almatyda dopty hokkeı – bendıden ótip jatqan álem chempıonatynda elimizdiń bas komandasy kezekti jeńisine jetti. Dúısenbi kúni otandastarymyz AQSh quramasymen bolǵan ekinshi oıynynda qarsylastaryn 13:3 esebimen utty.
Almatyda dopty hokkeı – bendıden ótip jatqan álem chempıonatynda elimizdiń bas komandasy kezekti jeńisine jetti. Dúısenbi kúni otandastarymyz AQSh quramasymen bolǵan ekinshi oıynynda qarsylastaryn 13:3 esebimen utty.
Bul ekinshi týrdaǵy kezdesý de Norvegııamen bolǵan oıyn sııaqty qyzyqty ótti. Á degennen-aq Alekseı Nıkıshovtyń jigitteri «Medeý» aıdynynyń qojaıyny kim ekenin birden kórsetti. Oıynnyń 4-mınýtynda Sergeı Pochkýnov esep ashty. 26 mınýtta amerıkalyqtar esepti teńestirgenimen, birinshi taımnyń sońyna deıin otandastarymyz taǵy 4 dop soǵyp, esepti 5:1-ge jetkizdi.
Ekinshi taımda qonaqtar shabýylǵa umtylyp, esepti qysqartýǵa tyrysqanymen, onysynan eshteńe shyqpady. Kerisinshe, Qazaqstan quramasynyń sapyndaǵy taǵy sol Sergeı Pochkýnov, Leonıd Bedarev, Vıacheslav Bronnıkov, komanda kapıtany Raýan Esálıev pen Dmıtrıı Zavıdovskıı qarsylastar qaqpasyn dál kózdedi. Bul oıynda Bronnıkov het-trık, Bedarev, Nasonov pen Pochkýnov dýbl jasasa, qalǵandary bir-bir doptyń avtory atandy. Al amerıkalyqtar sapynda Hosfeld, Sandberg, Savatske gol soǵyp, esepti sál de bolsa qysqarta aldy.
Keshe keshkisin bizdiń qurama Shvesııa quramasymen kezdesti. Oıyn kesh bitkendikten, onyń nátıjesin gazettiń kelesi sanynda habarlaýdy jón kórip otyrmyz. Basqa matchtarda byltyrǵy álem chempıony – Reseı quramasy Fınlıandııany áreń degende 5:4 esebimen jeńse, Shvesııa Norvegııadan 11:0 esebimen basym tústi. Osylardyń ishinde Reseı men Fınlıandııanyń oıyny qyzyqty jáne tartysty ótti. 1957 jyly Sýomıde ótkizilgen alǵashqy álem chempıonatynan beri bir-birimen ejelgi qarsylastar arasynda ótken oıynda reseılikter 2:0 esebimen jeńip kele jatyp, qarsylastarynan 4 birdeı dopty jiberip aldy. Birinshi taımda Sýomı hokkeıshileri esepti teńestirip qana qoımaı, 4:2 esebimen alǵa shyqty. Abyroı bolǵanda, Reseı quramasy tájirıbeli oıynshylarynyń arqasynda jeńiske jete aldy. Keshe keshkisin Reseı quramasy Norvegııamen kezdesse, búgin Qazaqstanmen kúsh synasady.
Al dúısenbide bolǵan úshinshi oıynda Shvesııa Norvegııany 11:0 esebimen utyp, álem chempıonatyna bas júlde úshin ǵana kelgenderin taǵy bir ret kórsetti. Shvesııa quramasy sapynda eń kóp dopty Krıstıan Mıkelsson soqty. Ol 5 goldyń avtory atandy. Bunyń aldynda Fınlıandııamen bolǵan oıynda Shvesııa quramasy qarsylastaryn 12:0 esebimen jeńgende, Iýnas Edlıng 3 doptyń avtory atanǵan bolatyn.
Osy kúni «V» tobynyń komandalary alǵashqy oıyndaryn ótkizdi. Belarýs Vengrııany 13:5 esebimen jeńse, Nıderlandy Latvııany 6:2 esebimen utty.
Keshe «S» tobynyń komandalary da jarys jolyna shyqty. Onda Estonııa áýeli Qyrǵyzstanmen, odan keıin Japonııamen kezdesti.
Qazir álem chempıonatynda Qazaqstan quramasy dop aıyrmashylyǵy boıynsha Shvesııadan keıin ekinshi orynda keledi. Shvesııa 23 dop soǵyp, qaqpasyna áli birde-bir gol jibermese, bizdiń el de 23 ret qarsylastar qaqpasyn dál kózdep, tek ózine 4 gol ǵana jiberip alǵan eken. Al Reseı quramasy eń kóp dop – 24 gol soqsa, qaqpasyna 8 gol jiberip, úshinshi orynda tur.
Osy kúnderi «Medeý» aıdyny naǵyz sport merekesine aınalyp otyr. Álem chempıonatyn uıymdastyrýshylardyń qazaq topyraǵynda alǵash ret ótip jatqan baıraqty dodaǵa tyńǵylyqty, jan-jaqty daıyndalǵany anyq baıqalady. Oıyndarǵa Dostyq dańǵylynan qoǵamdyq kólikter qatynap, muz aıdynyna kelgen soń eriktiler jankúıerlerge jol kórsetip, kerek kezde qasynan tabylyp jatady. Olardyń basym bóligi Azııa oıyndary kezinde birneshe tildi erkin meńgerip, qyzmet kórsetken qyz-jigitter eken.
Al oıyndar kezinde BAQ ókilderine arnalǵan baspasóz ortalyǵy minsiz jumys isteýde. Munda barlyq jýrnalıst ózderine qajetti aqparattardy alyp, baspasóz máslıhattarynda kez kelgen eldiń bapkerleri jáne sportshylarymen suhbattasyp, áńgimelese alady.
Qanat ESKENDIR.
