Atalǵan is-sharalardyń maqsaty – qoǵamdyq qaýipsizdikti qamtamasyz etý, atys qarýy men jarylǵysh zattardy qoldana otyryp jasalatyn qylmystar men quqyq buzýshylyqtardyń aldyn alý.
Bıyl atalǵan aksııa 10 sáýirden bastalyp, halyqtyń qolyndaǵy qarýlardy satyp alý úshin respýblıkalyq bıýdjetten 125,4 mln teńge bólingen.
– Aksııa sheńberinde el azamattary 2454 birlik atys qarýyn, 35 myń dana oıyq uńǵyly qarýdyń patrondaryn tapsyrdy, – dedi M.Baıbolov.
IIM-niń derekterine qaraǵanda, mundaı aksııa 2008 jyldan bastap ótkizile bastaǵan. Barlyq aksııalardyń nátıjeleri boıynsha halyq tarapynan aqshalaı syıaqyǵa erikti túrde 47 myńnan astam atys qarýy jáne 1 mıllıonnan astam oıyq uńǵyly qarýdyń patrondary tapsyrylǵan. Bul maqsattarǵa bólingen qazynanyń jalpy somasy 1,5 mlrd teńge qarajatyna el ishinen qarý-jaraq satyp alynǵan.
M.Baıbolov sońǵy on jyldaǵy arnaıy aksııalardyń nátıjesinde zańsyz aınalymdaǵy qarý-jaraq pen oq-dárilerdiń jáne jarylǵysh zattardyń anaǵurlym azaıǵandyǵyn aıtyp otyr. Tómendegen kórsetkish – 5,5 esege jeteǵabyl.
IIM ókiliniń aıtýyna qaraǵanda, turǵyndardyń qolyndaǵy zańsyz zattardyń azaıýyna túsindirý jumystarynyń aýqymy keńeıgendigi jáne qarýdy óz erkimen tapsyrýshylardyń ákimshilik, qylmystyq jaýapkershilikterden bosatylatyndyǵy sebep bolǵan.
– Bul IIM qolǵa alǵan jalǵyz is-shara emes. Jyl saıyn turaqty túrde «Qarý», «Quqyq tártibi», «Brakoner» jedel-aldyn alý sharalarynyń nátıjesinde de zańsyz saqtalǵan qarýlar tárkilenip keledi. Osy ýaqytqa deıin sońǵy atalǵan is-sharalar nátıjesinde zańsyz saqtalǵan 2 myńdaı qarý anyqtalyp, alyndy. Jalpy, segiz jyl ishinde zańsyz aınalymnan 60 myńnan astam qarý alynǵan bolsa, onyń 47 myńdaıyn halyq óz erikterimen tapsyrdy, – deıdi Ákimshilik polısııa komıteti tóraǵasynyń orynbasary.
IIM sońǵy jyldary atys qarýyn, jarylǵysh zattardy qoldaný arqyly jasalatyn qylmystardyń da azaıǵandyǵyn tilge tıek etti. Máselen, sońǵy bes jylda mundaı qylmystar eki esege azaıǵan.
Al turǵyndardan sýyq qarýdy erikti túrde qaıtarý aksııasy aldaǵy úsh jylda da jalǵasyn tappaq. Bul maqsattarǵa respýblıkalyq bıýdjetten 309 mln teńge qarastyrylǵan.
Serik ÁBDIBEK,
«Egemen Qazaqstan»
