Batys Qazaqstan oblysy ákiminiń orynbasary Mırjan Satqanovtyń quttyqtaý sózimen ashylǵan konferensııada akademık Qajym Jumalıevtiń qazaq aýyz ádebıeti, ádebıet tarıhy, ádebıet syny, ádebıet teorııasy salasyndaǵy zertteýleri jáne onyń búgingi kúnmen sabaqtastyǵy, jalpy elimizdegi fılologııalyq bilim berý: qazaq, orys, aǵylshyn tili men ádebıeti máseleleri, bastaýyshta jáne mektepke deıingi oqytý men tárbıeleýdegi jas erekshelik máseleleri sekildi kóptegen mańyzdy taqyryptar keńinen sóz boldy. Halyqaralyq konferensııaǵa arnaıy shaqyrylǵan tanymal ǵalym, ál-Farabı atyndaǵy Qazaq Ulttyq ýnıversıtetiniń professory, fılologııa ǵylymdarynyń doktory Zınol-Ǵabden Bısenǵalı «Ádebıet tarıhy men teorııasy týraly Qajym Jumalıev tolǵamdary» atty baıandama jasady.
Osy jıynǵa shetelderden - M.Aqmolla atyndaǵy Bashqurtstan memlekettik pedagogıkalyq ýnıversıtetiniń dosenti, fılologııa ǵylymdarynyń kandıdaty, «Bashqurt ádebıeti men mádenıeti» kafedrasynyń meńgerýshisi Galıma Galına, M.Aqmolla atyndaǵy Bashqurtstan memlekettik pedagogıkalyq ýnıversıtetiniń dosenti, tarıh ǵylymdarynyń kandıdaty, «Eýrazııa halyqtary folklory men etnografııasy» ǵylymı ortalyǵynyń jetekshisi Rozalına Baıazıtova, Qaraqalpaqstan Jazýshylar odaǵynyń ádebı máslıhatshysy, jazýshy, fılologııa ǵylymdarynyń kandıdaty Ámırlan Seıdın kelgen eken. Meımandar Qajym Jumalıevtiń tek qazaq ádebıeti emes, týysqan túrki halyqtary ádebıeti ǵylymynyń qalyptasýyna qosqan zor úlesin alǵys sezimimen atap ótti.
Ahmet Baıtursynuly atyndaǵy Til bilimi ınstıtýtynyń professory, fılologııa ǵylymdarynyń doktory Jamal Mankeevanyń «Rýhanı jańǵyrý: Akademık Qajym Jumalıev zertteýleri negizinde Abaıdyń «til álemin» taný» atty baıandamasyn da jınalǵandar jyly qabyldady.
Batys Qazaqstan ınnovasııalyq-tehnologııalyq ýnıversıtetiniń dosenti, fılologııa ǵylymdarynyń kandıdaty, osy halyqaralyq konferensııany uıymdastyrýshylardyń biri Azamat Mamyrov «Q.Jumalıev atyndaǵy ǵylymı zertteý jáne qosymsha bilim berý» ortalyǵy qurylǵanyn habarlady. Sonymen qatar ádebıettanýǵa ólsheýsiz úles qosqan ǵalymnyń atyndaǵy Jumalıev oqýlary Oral qalasynda jyl saıyn dástúrli túrde ótip turatyn boldy.
«Qajym Jumalıevtiń qazaq aýyz ádebıeti, ádebıet tarıhy, ádebıet teorııasy salasyndaǵy zertteýleriniń mańyzy orasan. Sondyqtan akademıktiń shyǵarmashylyǵy men týyndylaryn zertteýdi jańa beleske kóterý qajet» deıdi ǵalymdar.
Qazbek QUTTYMURATULY,
«Egemen Qazaqstan»
Sýretti túsirgen Temirbolat TOQMÁMBETOV
