Mınıstrlerdiń baıandamalaryn tyńdaǵan soń Premer-Mınıstr ótken ýaqytta Memleket basshysynyń tapsyrmasyn oryndaý boıynsha aýyqmdy jumystar atqarylǵanyn atap ótti. 2019 jyldyń 1 qańtarynan bastap elektr energııasynyń, gaz, jylý men sýdyń, kómirdiń, uıaly baılanys pen Internettiń baǵasy tómendeıdi. B.Saǵyntaev Memleket basshysynyń tapsyrmalary 1 qańtardan bastap oryndalýy kerektigin basa aıtty.
Osyǵan baılanysty, oblystardyń, Astana, Almaty, Shymkent qalalarynyń ákimdikterine turǵyndar úshin kómirdiń qolaıly baǵasyn qamtamasyz etý úshin óńirlik operatorlardyń úzdiksiz jáne sapaly jumysyn qamtamasyz etý tapsyryldy.
Sonymen qatar, Premer-Mınıstr birqatar óńirlerde jyldyń basynan beri qoqys shyǵarý tarıfteriniń óskenine toqtaldy. Ol Shyǵys Qazaqstan oblysynda 30%-ǵa, Batys Qazaqstan oblysynda 46%-ǵa, Soltústik Qazaqstan oblysynda 50%-ǵa jáne Almaty qalasynda 40%-ǵa ósken. Jolaýshylar tasymaly boıynsha Aqtóbe oblysynda jolaqy baǵasy 30%-ǵa ósken.
Premer-Mınıstr B. Saǵyntaev óńirlerdiń ákimderine oblystyń kommýnaldyq qyzmetter tarıfteriniń ósýine jol bermeýdi jáne olardy tómendetý boıynsha tıisti jumystar júrgizýdi tapsyrdy.
