«Astana» FK atqarýshy dırektory Qaısar Bekenovtiń aıtýynsha, klýb negizgi quram oıynshylarynan bólek, sońǵy jyldary qaladaǵy balalar fýtbolyna erekshe mán berip kele jatyr. Bul óz kezeginde jemisin berip, balalar Qazaqstan Respýblıkasy birinshiliginde jas erekshelikteri boıynsha júldeli oryndarǵa ıe bola bastaǵan.
– Osy jyly 2001 jáne 2006 jyly týǵan jasóspirimder komandalary el chempıony atandy. Jeke mekteptermen, sonyń ishinde «Arda Football» mektebimen memorandýmǵa qol qoıý bizdiń fýtbol ortalyǵyndaǵy básekelestikti arttyryp, komandaǵa úmitkerlerdi úzdiksiz irikteýge múmkindik beredi. Al básekelestik degenimiz – sporttyń eń basty tabys kilti, - dedi ol.
«Arda Football» jobasynyń PR dırektory Nazym Janǵazınova bul shara sport mektebi úshin eń mańyzdy oqıǵa ekenin aıtady.
– Biz Qazaqstannyń eń úzdik fýtbol klýby «Astanamen» yntymaqtastyq memorandýmyna qol qoıdyq. Memorandým aıasynda bizdiń fýtbol mektebiniń úzdik fýtbolshylary «Astana» fýtbol ortalyǵyna irikteletin bolady. Bul bizdiń kishkentaı fýtbolshylarymyz úshin úlken motıvasııa bolmaq. «Astananyń» óz alańynda ótkizetin oıynyna barar aldynda bizdiń balalar erekshe qulshynyspen jattyǵyp, aıryqsha kóńil kóteredi. Biz jattyǵý barysynda balalarǵa arnaıy kúndelik berip, ózderiniń úlgi alatyn fýtbolshylary týraly jazýlaryn suraımyz. Sol kezde jas jetkinshekterdiń 70 %-y «Astanany» tańdaıdy. Elorda komandasy qazirgi tańdaǵy jas urpaq úlgi etetin minsiz fýtbol úlgisin kórsetýde, - deıdi N.Janǵazınova.
