Elimizge qajetti 700-ge kásiptik mamandardy daıarlaıtyn óńiraralyq ortalyqtyń qurylysyn júrgizýge 2009 jyly Bilim jáne ǵylym mınıstrligi tapsyrys bergen-di. Qurylysqa respýblıkalyq bıýdjetten 4,5 mlrd teńge bólingen.
Mınıstrliktiń jospar boıynsha keshenniń qurylysy 17 aıda, 2010 jyldyń sońynda aıaqtalýǵa tıis-ti. Kezinde ortalyqtyń aıaqtalmaǵan qurylysy jaıly gazetimizde jazdyq.
Joba boıynsha ortalyq 14 bólikten, ıaǵnı, 14 jeke ǵımarattan turady. Árqaısysy 240 oryndyq eki jataqhana, 100 oryndy qonaq úı, sport ǵımaraty, ákimshilik korpýsy, 3 oqý ǵımaraty, 2 sheberhanadan turady.
Sol kezdegi Bilim jáne ǵylym mınıstrleri de, ákimder de aýysyp úlgerdi. Biraq, ortalyqtyń tómengi qabattary ishi sýǵa tolyp, sol qalpy iske qosylmady.
Ortalyqtyń keshenderi qatelikpen turǵyzylǵany, drenajdyq júıeleri jasalmaǵany, keshenniń syz batpaqty jerde salynǵany keıin baryp qana anyqtalady.
Sodan 2012 jyly nysannyń qurylysy toqtatyldy. 2016 jyly qaraýsyz qalǵan ortalyqtyń qurylys materıaldary urlana bastaıdy.
Sóıtip, búkil keshendi kúzetý oblys ortalyǵyndaǵy S. Toraıǵyrov atyndaǵy memlekettik ýnıversıtetke tapsyryldy.
Budan keıin Bilim jáne ǵylym mınıstriligi elimizde energetıka salasy úshin mamandardy daıyndaıtyn oqý oryndary jetkilikti, sondyqtan, keshen endi jergilikti ákimdiktiń qaraýyna alynsyn dep te sheshim shyǵarady.
Byltyr keshende jóndeý jumystary bastalyp, jóndeý jumystaryn júrgizetin «Portal-PV» JShS qurylysty sý basý qaýpi basylǵanyn jetkizdi.
О́kinishke oraı, kóktemde ortalyqtyń jertólesi qaıta sýǵa tola bastaıdy.
Búkil óńirge aty belgili qyrýar qarjy bólingen qaıran qurylystyń «qurdymǵa ketip bara jatqan» jaǵdaıy áli jalǵasýda.
Al, jýyrda «Ertis» telearnasynda ótken tikeleı efırde Ekibastuz qalasynyń ákimi Nurjan Áshimbetov qurylysy uzaqqa sozylǵan ortalyqty Bilim jáne ǵylym mınıstrligi jergilikti bıýdjetke tapsyrǵanyn málim etti.
- Nysan oblystyń kommýnaldyq menshiginde. О́tken jyly jerasty sýlaryn joıý boıynsha jumys júrgizildi. Qazir de jumys jalǵasýda. Merdigermen eki jyldyq kelisimshart jasalǵan. Ortalyq qurylysy 2019 jyly aıaqtalmaq, -dedi.
Farıda BYQAI,
«Egemen Qazaqstan»
Pavlodar oblysy
