2019-2023 jj. arnalǵan negizgi makrokórsetkishter men 2019-2021 jj. arnalǵan bıýdjettik parametrlerdiń naqtylanǵan boljamy týraly ulttyq ekonomıka mınıstri T. Súleımenov baıandady.
QR UEM málimetinshe, sońǵy eki aıda munaı baǵasy birshama qubylmaly boldy. Bıylǵy jyldyń qazan aıynyń basynda ol barreline $86,2 qurady. 23 qarashada munaı baǵasy barreline $58,8-ǵa deıin tómendedi. Aýytqý 32% qurady.
«Álem naryqtaryndaǵy aǵymdaǵy jaǵdaıdy jáne halyqaralyq qarjy uıymdarynyń boljamdaryn eskere otyryp, boljamdy munaı baǵasy bir barrel úshin $60-dan $55-ǵa deıin tómendedi. Jalpy ishki ónimniń naqty ósýi 2019 jyly 3,8% quraıdy. Bul rette jalpy ishki ónimniń ortasha jyldyq ósýi 4,1% quraıdy», - dep aqparattandyrdy T. Súleımenov.
2019 jyly nomınaldy jalpy ishki ónim 64 trıllıon teńgeden 2023 jyly 86,5 trıllıon teńgege deıin ósedi. Jan basyna shaqqandaǵy jalpy ishki ónim 2019 jyly $9,4 myń qurap, 2023 jyly $12,1 myńǵa deıin ulǵaıady.
Al óńdeý ónerkásibi 4,1%, taý-ken óndirý 3,0%-ǵa ósedi. Aýyl sharýashylyǵynda – 6,4%, qurylys salasynda – 4,1% saýdada – 4,4% kólemindegi turaqty qarqyny saqtalady.
«Eksport kólemi 2019 jyly $54,1 mıllıardty quraıdy. 2023 jyly $65,7 mıllıardqa deıin ulǵaıady. Import 2019 jyly $32,9 mıllıardty 2023 jyly $39,6 mıllıardqa deıin ósedi. Munaı óndirý kólemi 2019 jylǵy 88,0 mıllıon tonnadan 2023 jyly 99,0 mıllıon tonnaǵa deıin ósedi», - dep habarlady ulttyq ekonomıka mınıstri.
T. Súleımenov atap ótkendeı, ınflıasııa maquldanǵan deńgeıde 2019 jyly 4-6% saqtalady, 2020 – 2023 jyldary 3-4% deıin tómendeıdi. Makroekonomıkalyq túzetilgen boljam negizinde 2019 – 2021 jyldarǵa arnalǵan bıýdjet parametrleriniń boljamy qaıta qaraldy.
«Respýblıkalyq bıýdjet kirisi 2019 jyly 6 trln. 786 mıllıard teńge, 2020 jyly – 7 trln. 360 mıllıard teńge, 2021 jyly – 7 trln. 998 mıllıard teńge kóleminde boljanýda. Respýblıkalyq bıýdjet shyǵystarynyń boljamy 2019 jyly 10 trln. 727 mıllıard teńge, 2020 jyly – 11 trln. 59 mıllıard teńge, 2021 jyly – 11 trln. 402 mıllıard teńge kóleminde aıqyndaldy. 2019 jyly bıýdjet tapshylyǵy 2018 jyldyń deńgeıinde jalpy ishki ónimge qaraǵanda 1,5% josparlanǵan, al 2020 jyly – 1,4% jáne 2021 jyly – 1,3% deıin tómendeıdi», - dep baıandady T. Súleımenov.
Munaılyq emes tapshylyq 2019 jyly jalpy ishki ónimge qaraǵanda 6,9%-dan 2021 jyly – 5,3%-ǵa deıin qysqarady. Bul Ulttyq qordyń qarajatty qalyptastyrý men paıdalaný tujyrymdamasymen belgilengen nysanaly kórsetkishten aspaıdy.
Ulttyq qordyń valıýtalyq aktıvteri 2019 jyly $63 mıllıardtan 2021 jyly $67,4 mıllıardqa deıin ulǵaıady.
Úkimet otyrysyna beınekonferensııa baılanysy júıesi boıynsha QR Ulttyq bankiniń tóraǵasy Danııar Aqyshev qatysty, ol Ulttyq banktiń munaı baǵasynyń tómendeýi jaǵdaılarynda respýblıkanyń 2019-2023 jyldarǵa arnalǵan áleýmettik-ekonomıkalyq damý boljamyndaǵy ózgeristerdi qoldaıtynyn jetkizdi. Ulttyq banktiń ınflıasııa boıynsha ortasha merzimdik maqsaty 4% shamasyndaǵy deńgeı bolyp qalady. Inflıasııanyń 2019 jylǵy dáliz sheginen shyǵý táýekelderi saqtalady. Inflıasııanyń ósýine jol bermeý úshin aqsha-nesıe saıasatyn odan ári qatańdatý múmkindigi bar. Degenmen, naqty mánindegi bazalyq mólsherleme ekonomıka ósiminiń uzaqmerzimdi qarqynynan aspaıtyn bolady.
«Qazaqstannyń Ulttyq banki bankterdi saýyqtyrý jáne turaqtylyǵyn qamtamasyz etý boıynsha júıeli jumystardy jalǵastyrady. Atalǵan sharalar, «7-20-25» baǵdarlamasyn iske asyrý jáne bankterge 600 mlrd teńge kóleminde ótimdilik berý bankterdiń nesıelik belsendiliginiń artýyna septigin tıgizedi», - dedi D.Aqyshev
Qazaqstannyń 2019-2023 jj. arnalǵan jańartylǵan áleýmettik-ekonomıkalyq damý boljamyn Úkimet maquldady jáne qujat Parlament Senatynyń plenarlyq otyrysyna engizildi.
