...másele kóteredi
Sheshimin tabýǵa bolmas pa?
Eldiń osy bir oqylymdy gazeti arqyly kópten sheshimin tappaı kele jatqan myna bir máseleni tıisti oryndardyń nazaryna usynsam deımin. Ol, bizdegi Qazaqstannyń azamattyǵy joq, yqtııarhatymen ómir súrip jatqan azamattarǵa qatysty másele. Aýyldarda jumys oryndary óte tapshy. Sondyqtan kúneltýdiń birden-bir tásili – shaǵyn bolsa da jeke kásibin ashý. Osy maqsatta salyq organdaryna ótinish bildirgenimizde – ondaǵylar bizdegi zań boıynsha О́zbekstan azamattaryna kásipkerlikpen shuǵyldanýǵa tyıym salynǵandyǵyn málimdedi. Al reseılikter men qyrǵyzstandyqtarǵa múmkin eken. Sonda qalaı? Meniń oıymsha, bul másele О́zbekstandy basqarǵan aldyńǵy býyn basshylyqtyń kezinde úkimetaralyq keıbir kelisimderge qol jetkize almaǵandyqtan týyndaǵan bolýy múmkin. Qazir jaǵdaı múldem basqasha emes pe? Onyń ústine bıyl Elbasy tarapynan О́zbekstannyń Qazaqstandaǵy jyly bolyp jarııalandy. Osy múmkindikterdi paıdalanyp jumyssyzdarǵa másele týyndatyp jatqan osy bir túıtkildiń sheshimin tabýǵa bolmas pa eken? Onyń ústine, jumys istemegen soń zeınetkerlik qorǵa aqsha quıý jáne medısınalyq saqtandyrý sııaqty qosymsha máseleler de osyǵan táýeldi bolyp tur. Bir meni emes, kópshilikti tolǵandyryp júrgen osy másele sheshimin tapsa deımiz.
Kamıljan RYSMETOV
Túrkistan oblysy, Sozaq aýdany
...úlgi tutady
Bilikti kásipker, qamqor áje
Áıelder – otbasynyń yrys-berekesin saqtap, óskeleń urpaqqa tərbıe berýmen qatar, qoǵamnyń san alýan salasynda da belsendilik tanyta biledi. Qolǵa alǵan kəsibin keńeıtip, ər isin tyńǵylyqty júrgizetin kəsipker əıelder bizdiń aýdanda da jeterlik. Sondaı jandardyń biri – Jibek Əmiljanova. Jibek apaı eń alǵash 1987 jyly saýda ortalyǵyn ashyp, adamdardy kıimmen qamtamasyz ete bastady. Birtindep kəsibin úlkeıtip, bara-bara budan da úlken birneshe azyq-túlik dúkenin ashyp, aýdannyń əleýmettik-ekonomıkalyq damýyna óziniń úlesin qosyp keledi. Saýda-sattyqtyń ystyǵy men sýyǵyn bastan ótkergenine 30 jyldyń júzi bolǵan kəsipker Jibek óz isine myǵym.
Al qoly qalt ete qalsa nemerelerine toqyma men quraq kórpe tigý ədisterin úıretedi. «Ər mamandyqtyń ózindik qıyndyǵy men qyzyǵy bolady. Aldaǵy jyldarǵa jospar quryp, qaı deńgeıden kórine alatynymdy, qansha adammen qalaı jumys isteı alatynymdy, bərin-bərin baǵamdaýǵa tyrysamyn. Shyraıly Alakóldiń janynda 2016 jyly kishigirim demalys ornyn salǵan edik, al qazirgi tańda osy demalys úıin úlkeıtsem be degen oıdamyn» degen Jibek əje kəsibin nəsibine aınaldyryp keledi. Qolynda baryn ózgemen de bólisip, əl-aýqaty tómen kisilerge qaraılasyp turady.
Janerke SAǴYMJAN
Shyǵys Qazaqstan oblysy, Úrjar aýdany
...áserimen bólisedi
О́negeli otbasy – qoǵam baılyǵy
Otbasy – adam ǵumyrynyń tiregi ǵana emes, qoǵamnyń da basty negizi. Otbasynyń basty qazyǵy, altyn tireý dińgegi – bala. Balanyń tárbıeli bolyp ósýine berekeli otbasynyń áseri mol. Otbasy qundylyqtaryn nasıhattap, ata-ana men bala arasynda izgi qarym-qatynastyń ornaýyna yqpal etý maqsatynda S.Jıenbaev atyndaǵy oblystyq jasóspirimder kitaphanasynda «О́negeli otbasy – qoǵam baılyǵy» atty kezdesý keshi ótkizildi.
«Otan otbasynan bastalady» degen dana sóz bar. Ata-ananyń bir- birine qarym-qatynasy, júris-turysy, sóıleý mádenıeti, barlyq is-qımyldary balanyń boıyna tárbıe bolyp qalyptasady. «Uıada ne kórseń, ushqanda sony ilersiń» degen ata-babamyzdan qalǵan asyl sóz tekke aıtylmaǵan.
Bala tárbıesi – ortaq is. Sondyqtan kitaphanada ótken shara barysynda qonaqtar jastarmen oı bólisip, ónegeli áńgimeler aıtty. Kitaphanashylar tarapynan qısyndy suraqtar qoıylyp, oıyndar oınaldy. Sondaı-aq «Berik otbasy – qoǵamnyń tiregi» atty kitap kórmesi uıymdastyrylyp, «Ult birliginiń uıasy – ónegeli otbasy» atty beınerolık, slaıd kórsetilip, kezdesý keshi kóńilge keremet áser qaldyrdy.
Altyngúl ERMEKBAEVA,
S.Jıenbaev atyndaǵy oblystyq jasóspirimder kitaphanasynyń bólim meńgerýshisi
Aqtóbe
...senim artady
Eki nárseni tańdaǵanda qatelespeý qajet
Shetpedegi M.Atymov atyndaǵy orta mektepte mamandyq tańdaý jıyny ótip, oǵan aýdandyq jastar resýrstyq ortalyǵynyń basshysy A.Qonarbaev jáne elimizdegi JOO-da oqyp júrgen stýdentter, bolashaq mamandar jáne mekteptiń oqýshylary qatynasty.
Jıyndy mektep psıhologi Danagúl Tashekenova ashyp: «Adam balasy ómirde eki nárseni tańdaǵanda qatelespeý qajet. Onyń birinshisi – ómirlik jar tańdaǵanda, ekinshisi – mamandyq tańdaǵanda. Búgingi sharanyń maqsaty – mamandyq tańdaýda qatelespeý úshin kásiptik baǵdar berýdi uıymdastyrý, jastarǵa jón siltep, baǵyt berý, óz salasynyń mamandarymen sóılesip, aqyl-keńesterin tyńdaý», dedi.
A.Qonarbaev: «Meniń eki mamandyǵym bar, birinshisi – kólik ınjeneri. Ol mamandyqty úzdik bitirdim, biraq ol salada eńbek etpedim. Ekinshi mamandyǵym – qazaq tili men ádebıeti muǵalimi. Osy salada tabandy eńbek etip kelemin. Osy kúnge deıin tórt kitabym jaryq kórdi. Adam balasynda jan-jaqty bilim bolsa, qabileti joǵary bolsa – ol adam kez kelgen jumysty jasaı alady», dep keńesin berdi.
Jıynda jastar da ózderiniń stýdenttik kezdegi qyzyqtary men mamandyqtaryna qaraı bilim tájirıbesi jaıynda oılaryn ortaǵa saldy.
Qalampyr QULMYRATOVA
Mańǵystaý oblysy, Mańǵystaý aýdany
