Saltanatty jıynda quttyqtaý sóz alǵan Elbasy Qorynyń dırektory D.Nazarbaeva: «Elimizdiń ulyq merekesi qarsańynda júzdesip otyrmyz. Barshańyzdy quttyqtaımyn! 27 jyl ishinde elimizben birge ulttyq jýrnalıstıkamyz da biraz synnan ótti. Qazirgi tańda qoǵam jýrnalısterge úlken senimmen qaraıdy. Bul – zor jetistik ári jaýapkershilik», deı kele, jeńimpazdarǵa shyǵarmashylyq tabys tiledi.
Uıymdastyrýshylardyń málimetinshe, «Úzdik televızııalyq materıal», «Úzdik radıomaterıal», «Gazetter men jýrnaldardaǵy úzdik maqala», «Ǵalamtor BAQ-taǵy úzdik jarııalanym» atalymdary boıynsha jarııalanatyn baıqaý bıyl elordanyń 20 jyldyǵyna arnalǵan «El júregi – Astana» nomınasııasymen tolyqqan. Jyl ótken saıyn qoǵamda atalǵan sharanyń tanymaldylyǵy artyp, qatysýshylar qatary ulǵaıyp keledi.
Byltyr 447 jumys joldansa, bıyl 120-dan asa BAQ-tan 564 jumys qabyldanǵan. D.Nazarbaeva kelip túsken jumystardyń sany ǵana emes, sapasy da artqanyn atap ótti. Osy jylǵy jumystar egemen elimizdiń jetistikterin jetkizýdegi tereń mazmun, kórkemdik sheberlik turǵysynan erekshelendi. Sonymen qatar jobaǵa sheteldik jýrnalıster de qyzyǵýshylyq tanytqan. Osyǵan oraı, baıqaýǵa halyqaralyq dáreje berilip, kelesi jyly «Sheteldik BAQ-taǵy úzdik jumys» jańa nomınasııasy qosylmaq.
Baıqaý qorytyndysy boıynsha telearna, saıt, radıo tilshilerimen birge, «Egemen Qazaqstan» gazeti saıasat jáne quqyq bóliminiń meńgerýshisi Joldybaı Bazar júldeli III oryndy ıelendi. Sondaı-aq áriptesimiz – «Kazahstanskaıa pravda» gazetiniń qyzmetkeri Anastasııa Prılepskaıa da jeńimpazdar qatarynan tabyldy.
Bıyl úshinshi jyl uıymdastyrylyp jatqan saıysta júlde alǵan jeńimpazdarǵa 200 000, 500 000, 1 000 000 teńgeden syıaqy, dıplom men tósbelgi tabystaldy.
Aıdana ShOTBAIQYZY,
«Egemen Qazaqstan»
