2010 jyly bastalǵan «Medısınalyq poıyzdar» jobasy shalǵaı eldi-meken turǵyndaryna joǵary sapaly medısınalyq kómek kórsetýdi kózdeıdi. «Samruk-Kazyna Trust» áleýmettik jobalardy damytý qorynyń bas dırektory Dııas Ázbergenov jyl saıyn jemisti jumys atqaryp kele jatqan ıgilikti joba bıyl da sátti aıaqtalǵanyn aıtty.
«Bıylǵy jyly Prezıdent óz Joldaýynda alǵashqy medısınalyq-sanıtarlyq kómektiń sapasyn, ásirese aýyldyq jerlerde arttyrýdy tapsyrdy. 3 qyrkúıekte jolǵa shyqqan «Densaýlyq» jáne «Salamatty Qazaqstan» medısınalyq poıyzdary Almaty, Túrkistan, Qaraǵandy, Pavlodar, Atyraý, Mańǵystaý, Qostanaı, Qyzylorda jáne Shyǵys Qazaqstan oblystaryndaǵy 127 stansada toqtap, 41 360 adamǵa medısınalyq kómek kórsetti. Munyń ishinde 6 myńnan astam tekserý balalarǵa jasaldy. Terapevt, tis dárigeri, oftalmolog, mammolog jáne basqa da mamandardy qamtyǵan 10 medısınalyq top 192 195 dárigerlik qabyldaý ótkizdi. Sondaı-aq mamandar 67 myńnan astam dıagnostıkalyq emshara jáne 3 myń shaǵyn hırýrgııalyq operasııa jasaldy», dedi D.Ázbergenov.
Atalǵan poıyzdar MRT, rentgen, FGDS, ÝDZ sııaqty zamanaýı dıagnostıkalyq quraldarmen jabdyqtalǵan, sondaı-aq, stomatologııalyq, LOR jáne oftalmologııalyq apparattardyń sońǵy úlgilerimen qamtamasyz etilgen.
Baspasóz máslıhatyna sóz alǵan «Densaýlyq» poıyzy medısınalyq brıgadasynyń bas dárigeri Arzyqul Kenjeev joba arqyly týberkýlez, qaterli isik jáne júrek-qan tamyrlary aýrýlaryn asqyndyrmaı, erte anyqtaýǵa múmkindik týǵanyn aıtady. Sondaı-aq ol bıylǵy jyly kóp baıqalǵan bes túrli aýrýdy atady. Atap aıtqanda dárigerler óńirlerde arterııalyq gıpertonııa, ıshemııalyq aýrý, qant dıabeti, sozylmaly bronhıt jáne endemııalyq jemsaý sııaqty derttiń dendep turǵanyn anyqtaǵan.
Joba «Samuryq-Qazyna» AQ kompanııalar tobynyń «Samruk-Kazyna Trust» áleýmettik jobalardy damytý qory jáne Densaýlyq saqtaý mınıstrligi, sonymen qatar «Qazaqstan temir joly» UK» AQ-tyń «Áleýmettik jobalar» korporatıvtik qorynyń qoldaýymen júzege asyp keledi.
Maıgúl SULTAN,
«Egemen Qazaqstan»
