Elimizdegi medısınalyq múmkindikter týraly aqparatpen qamtamasyz etetin arnaıy onlaın portal (medicaltourism.kz) iske qosylǵan. 1430 nómiri boıynsha Call-ortalyq táýlik boıy qyzmet kórsetedi. Budan bólek elimizdegi medısınalyq týrızmniń damýyna úles qosyp jatqan týrıstik operatorlardyń da mańyzy artyp keledi. Osyny eskergen Densaýlyq saqtaýdy damytýdyń respýblıkalyq ortalyǵy týrıstik operatorlarǵa arnaıy týr uıymdastyrdy. Týrıstik fırma ókilderi Ulttyq neırohırýrgııa ortalyǵy, Ulttyq kardıohırýrgııa ortalyǵy, Ana men bala ulttyq ǵylymı ortalyǵy, «Úmit» tomoterapııa jáne ıadrolyq medısına ortalyǵy sııaqty birqatar jetekshi klınıkalarda bolyp, ınnovasııalyq medısınalyq qyzmettermen tanysty.
Ulttyq neırohırýrgııa ortalyǵynyń joǵary sanattaǵy neırohırýrgi Nurman Chabdarovtyń aıtýynsha, 10 jyl boıy qyzmet kórsetip kele jatqan medısınalyq mekeme sońǵy jyldary 300-den astam sheteldik pasıentti emdegen. Dəriger Tájikstannan kelip, mı isigi degen qaýipti dıagnozben túsken áıelge alty kún buryn operasııa jasalǵanyn mysalǵa keltirdi. Naýqas aýrýhanadan jazylyp shyǵyp, eline qaıtqan eken. «Bizge keletin sheteldik pasıentter jyldan-jylǵa kóbeıip keledi. Olar neırohırýrgııa, nevrologııa boıynsha qyzmetimizge júgindi. Atap aıtqanda, ortalyq júıke júıesi, bas, mı, omyrtqa, julyn aýrýy bar naýqastar emdeldi. Budan bólek, dəri-dərmek, fızıoterapııa túrinde kómektesemiz. Pasıentter Reseı, О́zbekstan, Qyrǵyzstan sııaqty kórshi elderden jıi keledi», dedi N.Chabdarov.
Týrǵa qatysqan «KITO» týrıstik kompanııasynyń dırektory Jazıra Jankına Qazaqstandaǵy medısınalyq qyzmetterdiń Ońtústik Koreıa, Eýropa elderimen salystyrǵanda 4-5 esege arzan əri sapasy da jaqsy ekenin aıtady. Sondyqtan da otandyq mamandarǵa habarlasatyn sheteldikter de az emes kórinedi.
Uıymdastyrýshylar aqparattyq týrdyń el medısınasynyń áleýetin tanystyrýǵa mol múmkindik beretinin aıtady. Is-shara sońynda aqparattyq týrǵa qatysýshylar atalǵan klınıkalarmen ekijaqty memorandýmǵa qol qoıýǵa ázir ekendikterin jetkizdi.
Maıgúl SULTAN,
«Egemen Qazaqstan»
