Talǵardaǵy tálim ordasy
Seısenbi, 13 naýryz 2012 8:22
Ekonomıkany turaqtandyryp, jańa tehnologııany óndiriske engizý saıasatyn qansha jerden qolǵa alǵanymyzben, jumyssyzdyq máselesi túbegeıli sheshilmeı turǵan máseleniń biri ekeni ras. Bul – barlyq qoǵamda da, kez kelgen memlekette de kezdesetin kúrdeli túıin. Elbasy halyqty jumyspen qamtamasyz etýdiń strategııasyn jasap, ár jylda túrli memlekettik baǵdarlamalar arqyly jumyssyzdyqtyń aldyn alý sharasyn nyǵaıtý kerektigin óziniń jyl saıynǵy Qazaqstan halqyna Joldaýynda basa nazarǵa alyp keledi.
Seısenbi, 13 naýryz 2012 8:22
Ekonomıkany turaqtandyryp, jańa tehnologııany óndiriske engizý saıasatyn qansha jerden qolǵa alǵanymyzben, jumyssyzdyq máselesi túbegeıli sheshilmeı turǵan máseleniń biri ekeni ras. Bul – barlyq qoǵamda da, kez kelgen memlekette de kezdesetin kúrdeli túıin. Elbasy halyqty jumyspen qamtamasyz etýdiń strategııasyn jasap, ár jylda túrli memlekettik baǵdarlamalar arqyly jumyssyzdyqtyń aldyn alý sharasyn nyǵaıtý kerektigin óziniń jyl saıynǵy Qazaqstan halqyna Joldaýynda basa nazarǵa alyp keledi.
Osy rette jumyssyzdyqqa qarsy shara qoldaný maqsatymen el Úkimeti «Jumyspen qamtý-2020» baǵdarlamasyn qabyldaǵan edi. Bul baǵdarlamanyń maqsaty jumyspen turaqty túrde qamtamasyz ete otyryp, halyqtyń tabysyn arttyrý bolatyn. Údeden shyǵý úshin búgingi tańǵa deıin birshama is atqarylyp, kóńilge qonarlyqtaı nátıjesi de baıqalýda.
Jýyrda Almaty oblysyna qarasty Talǵar qalasynda ornalasqan №4 kásiptik lıseı Elbasy N.Nazarbaevtyń Qazaqstan halqyna arnaǵan bıylǵy «Áleýmettik-ekonomıkalyq jańǵyrtý – Qazaqstan damýynyń basty baǵyty» atty Joldaýy aıasynda oblys kólemindegi kásiporyn basshylarynyń basyn qosyp, dóńgelek ústel otyrysyn ótkizdi. Atalmysh sharaǵa respýblıkalyq deńgeıde ónim óndirip otyrǵan «Sultan», «Baron», «Tulpar-ekspress», «Glazman», «Baıserke-AGRO» JShS-leri, «Vodokanal» MKK, «Alataý jaryq» kompanııasy sekildi kásiporyn ókilderi qatysty. Kóterilgen másele qajetti mamandyqtarǵa bilikti maman tárbıeleý jáne óńirdegi jumyssyzdyq problemasymen jumyla kúresý sharalaryn jańa deńgeıge kóterý jóninde boldy.
Seksen jyldyq tarıhy bar №4 kásiptik lıseı – irgetasy qalanǵaly beri aýyl sharýashylyǵy men halyqqa qyzmet kórsetý mekemelerine maman daıarlaý jáne jastarǵa kásiptik-tehnıkalyq bilim berý isin turaqty da tyńǵylyqty júrgizip kele jatqan bilim oshaǵy. Táýelsizdik alǵan kezdegi eleń-alań shaqta da, ekonomıkalyq-qarjylyq daǵdarys tyǵyryqqa tiregen ýaqytta da bul oqý ordasy toqtaýsyz jumys istep turdy. Tipti, memleket tarapynan qarjylaı qoldaý kórmeı, jekeshelendirýdiń tuzaǵyna túsýdiń de az-aq aldynan ótti. Kóptegen kásiporyndar daǵdarysty syltaý etip lıseı shákirtterin jumysqa qabyldaýdan bas tartqan, oqý ordasymen jasasqan ekijaqty kelisim-shartty buzýǵa deıin barǵan. Tek sońǵy 3 jyl kóleminde ǵana lıseıdiń materıaldyq-tehnıkalyq bazasy jańaryp, kerekti oqý quraldary men jabdyqtar alyna bastady. Atap aıtsaq, 2009-2010 jyldary 1,739 mıllıon teńge, 2011 jyly 15 mıllıon jáne oblys ákimdigi tarapynan 116 mıllıon teńge qarjy bólinip, ol aqshaǵa lıseı ǵımaraty kúrdeli jóndeýden ótkizilgen, oqý kabınetteri men sheberhanalarǵa qajetti jıhazdar, kompıýterler, ınteraktıvti taqta alynǵan.
Qarjylyq qoldaýdyń kómegimen kásiptik lıseı 2009 jyly – 106, 2010 jyly – 194, al 2011 jyly 162 jas mamandy daıarlap, qala men oblys aýmaǵynda jumys istep otyrǵan óndiris oryndaryna ornalasýǵa septigin tıgizgen. Sonymen qatar, Úkimettiń «Jol kartasy» baǵdarlamasyn júzege asyrýǵa da súbeli úlesin qosyp, 2009 jyly – 343, 2010 jyly 79 jáne 2011 jyly 85 mamandy daıyndaý jáne qaıta daıarlaý kýrsynan ótkizip, biliktilikti rastaý jáne berý ortalyǵynyń nátıjesi boıynsha 184 oqý bitirýshisiniń 148-i biliktilik testin nátıjeli tapsyryp shyqqan. Bul №4 kásiptik lıseıde tájirıbeli ustazdar ortasynyń qalyptasqandyǵy men mamandyqqa daıarlaý tásiliniń durys jolǵa qoıylǵandyǵyn kórsetedi.
Buryn «Aýyl sharýashylyǵyn sýlandyrý mehanızatory» deıtin mamandyqqa suranys mol bolsa, búgingi zaman talabyna saı «Avtomobıl jóndeýshi jáne tehnıkalyq qyzmet kórsetý» mamandyǵyna qyzyǵýshylyq tanytý jáne jeke kásipkerler tarapynan tehnıka mamanyna suranystyń artýyna baılanysty lıseı zamanaýı mamandyqtardy ıgerýdi qolǵa alyp otyr. Respýblıka kólemindegi irili-usaq qalalar men aýdandardy aıtpaǵannyń ózinde, bir ǵana Talǵar qalasynda mashına jóndeý ortalyqtary kóptep ashyla bastaǵan. Sol sebepti de «Avtomobıl jóndeýshi jáne tehnıkalyq qyzmet kórsetý» mamandyǵy boıynsha jylyna 50 shákirt bilikti daıyn maman retinde ómirde óz ornyn taýyp, eńbek jolyna túsýde. Teorııalyq sabaq kezinde Iа.Iаgmýrov, S.Jaqabaev, O.Júkelov sekildi 25-30 jyldyq eńbek ótili bar tájirıbeli oqytýshylar jas mamandardy sheberlikke baýlıdy.
Qanat ESKENDIR.
Almaty.
