Degenmen ár nárseniń de eki jaǵy bar degen ǵoı. Qardyń shekten tys kóptigin de qadege jaratyp, kóz qýantatyn túrli músin jasaǵan jandar az emes. Tipti biri birinen asyp túsip, kórgen jandy tańǵaldyrǵandar tabyldy.
Solardyń biri – Oraldaǵy №1 órt sóndirý bóliminiń aldynda paıda bolǵan «órt sóndirgish mashına». Tutasymen qardan jasalǵan bul músin «ZıL-131 AT-40» avtokóliginiń dál kóshirmesi. Azamattyq qorǵaý leıtenanty Darhan Azamatov, kishi serjant Álisher Quttyǵalı, bólimshe komandıri Valerıı Sıdelnıkov jáne basqalarynyń qolynan shyqqan bul qar-músin búginde oraldyqtardyń toqtaı qalyp, sýretke túsetin ornyna aınalǵan. Bir táýiri, №1 mamandandyrylǵan órt sóndirý bólimshesiniń basshylyǵy bul bastamany qoldap, «músinshilerge» syr-boıaý taýyp bergen. Sóıtip, qardan jasalǵan kólik «01» qyzmetiniń dástúrli qyzyl túsine enip, tipti ádemilene túsken edi.
- Bıylǵy kóp qardyń jaqsylyǵyn da kóreıik dep biz de mektep aýlasyna túrli qar-músinder jasadyq. Bul iske bizdiń shaǵyn ortalyqtyń tárbıeshilerinen bólek, ata-analar da qar qalashyǵyn jasaýǵa erekshe qulshynyspen atsalysty, - deıdi Oral qalasyndaǵy №47 mektep dırektory Natalıa Erǵojıeva.
Mektep dırektorynyń aıtýynsha, shyrsha, Aıaz Ata, haıýanattar men túrli kólikterden quralǵan qar qalashyǵyn jasaýǵa mekteptiń eń kishkentaı shákirtteri tárbıelenip jatqan «Baldyrǵan», «Erkem-aı», «Kúnshýaq», «Gúlderaı» toptarynyń tárbıeshileri túgel qatysqan. Mektep aýlasyndaǵy qyzyl-jasyl túske boıalǵan bul oıynshyqtar bal dáýren balalyq shaqtyń qyzyǵyn ústeı túskendeı boldy.
Áıtkenmen terektilik Erlan Rysqalıevtiń bıiktigi 8 metrden asatyn alyp aqqalasy bárinen asyp túsken syńaıly.
- Erlan bul aqqalany «Youtube» jelisindegi balalarǵa arnalǵan «Almazık TV» arnasy jarııalaǵan «Eń alyp 100 aqqala» baıqaýyna qatysý úshin turǵyzǵan eken, - deıdi bizdiń terektilik áriptesimiz, alyp aqqalany kózimen kórip, sýretke túsirip qaıtqan Aıagóz Aıtqalıeva.
Erlan Rysqalıev bıiktigi 8,2 metrlik aqqalany 7 kúnniń ishinde soqqan. Baıqaý sharty boıynsha bul «qurylysqa» aýyr tehnıkany paıdalanýǵa bolmaıdy. Bári de qol eńbegimen jasalýy tıis. Erlanǵa dostary Arman Serikov pen Jasulan Onbaev kómektesipti. Al jubaıy Zarına jumys barysyn beınejazbaǵa túsirip alǵan. «Youtube» jelisinde jarııalanǵan bul jazba búginde myńdaǵan kórilim jınap jatyr.
Qazbek QUTTYMURATULY,
«Egemen Qazaqstan»
Batys Qazaqstan
