Jambyl oblysy aýmaǵyndaǵy iri jol apaty 11 adamnyń ómirin qıdy

Apat saldarynan jeńil kólikte otyrǵan áıel oqıǵa ornynda kóz jumdy. Sol sátte Shymkent qalasynan Alma­ty qalasyna baǵyt alǵan Van Hool (memleket­tik nómeri 8213 FA 13) avtobýsy apatqa ushyraǵan kólikti aınalyp ótpek bolyp, aýdarylyp, 8 jolaýshy oqıǵa ornynda qaza boldy. Sonymen qatar 42 adam zardap shekken. Kólik ishinde 46 azamat bolǵan bolsa, keıinnen olardyń qatarynda О́zbekstan jáne Tájikstan azamattarynyń bolǵany anyqtaldy. Al qalǵan 2 jolaýshy – qazaqstandyq azamat.

Oblys ákimdigi baspasóz qyzmetiniń habarlaýynsha, oqıǵa ornyna jedel túrde Qordaı aýdanynyń ákimi Bolatbek Baıtóle jáne jedel járdem, tóten­she jaǵdaı qyzmetteri jetip, zardap shekkenderdi Otar stansasyndaǵy jáne Qordaı aýdanyndaǵy aýrýhanalarǵa jetkizdi. Apatqa ushyraǵandardyń 2-eýi aýrýhanaǵa jetpeı kóz jumǵany belgili boldy. Sonymen apat saldarynan 11 adam qaza tapty. Sondaı-aq 5 adam ota ústelinde, al 3 adam jan saqtaý bóliminde jatyr. Jaraqat alǵan basqa jolaýshylarǵa tıisti kómek kór­setilýde. Zardap shekkenderge jedel kómek kórsetýge oblystyq densaý­lyq basqarmasynyń basshysy Marat Ju­man­qulov bastaǵan 3 otashy-dáriger tikushaqpen Qordaı aýdanyna bardy. 

M.Jumanqulovtyń aıtýynsha, búgin­gi tańda 31 azamatqa medısınalyq kómek kór­setilgen. Sonymen qatar 9 azamat О́zbek­stan Respýblıkasy Tótenshe jaǵdaı­lar mınıstrliginiń jelisi arqyly О́zbekstan Respýblıkasyna aýystyryl­ǵan. Al 4 azamat Qordaı aýdandyq aýrýhanasyna jatqyzylǵan bolsa, 5 jolaý­shy №1 Taraz qalalyq aýrýhanasyna jat­qyzylǵan. 

Al 9 adamdy týystary Almaty qalasyna alyp ketse, 4 adam týystary­nyń kómegimen Shymkent qala­sy­na jetkizilgen. «Áskerı gospı­tal­den barlyq naýqastar Qordaı aýdan­dyq ortalyq aýrýhanasyna aýystyryldy. Aýrýhanada jatqan naýqastar qajetti dári-dármektermen tolyq qamtamasyz etilgen», deıdi M.Jumanqulov.

Oryn alǵan oqıǵaǵa qatysty oblys ákimi Asqar Myrzahmetovtiń tapsyrmasymen Taraz qalasynda arnaıy komıssııa quryldy. Sonymen qatar táýlik boıy qaýyrt jeli iske qosyldy. Komıssııa quramynda oblys ákiminiń birinshi orynbasary Bekbolat Orynbekov, oblystyq polısııa departamentiniń bastyǵy, polkovnık Arman Orazalıev jáne basqa da tıisti laýazym ıeleri bar. Komıssııa oqıǵa ornyna baryp, jol-kólik oqıǵasynyń mán-jaıyn anyqtap, zardap shekkenderge sapaly kómek kórsetýdi uıymdastyrýda. Sonymen birge oqıǵa ornynda oblys prokýrory Jarqyn Qusaıynov jumys istedi. Al apatqa qatysty Qazaqstan Respýblıkasy Qylmystyq kodeksiniń 345-babynyń 4-tarmaǵyna saı qylmystyq is qozǵaldy.

Búgingi tańda Jambyl oblysynda jalpy uzyndyǵy 266 shaqyrymdy quraıtyn respýblıkalyq mańyzy bar «Merke-Shý-Býrylbaıtal» avtojolynyń qaıta jańartý jobasy 101 mıllıard teńgeni quraıdy. Jambyl oblystyq jolaýshylar kóligi jáne avtomobıl joldary basqarmasynyń basshysy Baqytjan Jánibekovtiń aıtýynsha, qytaılyq «Sın-Sın» jáne otandyq «ABK Avtodor NS» birikken kompanııalary tarapynan atalǵan avtojoldy qaıta jańartý jumystary bıylǵy 7 sáýirden bastalǵan. Joba 2019-2022 jyldary iske asyrylatyn bolady. 

Jambyl oblysy