Balalarǵa syılyq tartý etilip, tal egilip, tusaý kesildi

Qazaqstan Respýblıkasy Mádenıet jáne sport mınıstri Arystanbek Muhamedıuly bastaǵan elimizdiń bir top óner maıtalmandary, joǵarǵy oqý oryndarynyń rektorlary men óner mekemeleriniń basshylary bas qosqan shara shymyldyǵy Akademııanyń «Teatr óneri», «Estrada óneri» «Ulttyq óner» fakýltetteri jáne «Astana Musical» teatry ártisteriniń Naýryz merekesine arnaıy daıyndaǵan teatrlandyrylǵan salt-dástúr kórinisimen ashyldy.

Naýryzdy jańasha toılaý týraly tyń bastama kóterip júrgen Mádenıet jáne sport mınıstri Arystanbek Muhamedıuly merekege jınalǵan qaýymǵa: «Tól merekemiz áz-Naýryzdyń búgin toılanyp jatýynyń ózindik ereksheligi bar. Sizderdi Naýryz merekesimen quttyqtaý úshin elimizdiń aldyńǵy býyn óner ókilderi, qazaq óneriniń maqtanyshtary jıylyp otyr. Árıne, T.Júrgenov atyndaǵy Qazaq ulttyq óner akademııasy sııaqty irgeli óner ordasynda ulttyq merekemizdiń dál osyndaı joǵary deńgeıde uıymdastyrylýy zańdylyq. Sebebi ónerdiń bastaý-bulaǵy, qaınary – osynda. Barlyǵyńyzdy Naýryz merekesimen quttyqtaımyn» , dep júrekjardy tilegin arnady.

Akademııa rektory Ashat Maemırov bıylǵy naýryzdy toılaýda Arystanbek Muhamedıulynyń respýblıkalyq «Egemen Qazaqstan», «Aıqyn», «Abaı.kz» basylymdarynda jaryq kórgen «Naýryzǵa – jańa kózqaras» maqalasynda aıtylǵan tyń oılardyń negizge alynǵanyn, áser-yqpaly bolǵanyn jasyrmady. Maqaladaǵy «Naýryzǵa ábden jattandy bolǵan shapan men kamzoldyń ornyna, árkim óziniń ústine qonymdy, sán-saltanaty kelisken, maqtanyshpen kórsetetin zamanaýı úlgimen kıinip, ysyrapqa jol bermeýge barynsha den qoıdyq. Sondaı-aq bul kúngi basty maqsatymyz – búldirshinderdi qýantý», dedi rektor. Osyǵan oraı ortaǵa Almatydaǵy № 1 balalar úıiniń balǵyndary shaqyrylyp, Akademııa ujymy atynan balalarǵa kıim-keshek, táttiler men oıynshyqtar tartý etildi.

Qazaqstannyń halyq artısi, abyz akter Sábıt Orazbaev syılyqtarǵa ıe bolǵan búldirshinderdi jáne Akademııanyń stýdentteri men qyzmetkerlerin merekemen quttyqtap, kıeli shańyraqtan túlep ushatyn jastarǵa aq batasyn berdi.

Merekege Qazaqstannyń eńbek eri, KSRO jáne Qazaqstannyń halyq ártisi Asanáli Áshimov, Qazaqstannyń halyq ártisi, Memlekettik syılyqtardyń laýreaty Sábıt Orazbaev, Qazaqstannyń eńbek sińirgen qaıratkeri, Qazaq ulttyq óner akademııasynyń professory Pernebek Momynov, Qazaqstan Respýblıkasynyń Memlekettik syılyǵynyń ıegeri, jazýshy-dramatýrg Dýlat Isabekov, S.Asfendııarov atyndaǵy Qazaq Ulttyq medısına ýnıversıtetiniń rektory Talǵat Nurǵojın, Qazaq memlekettik qyzdar pedagogıkalyq ýnıversıtetiniń rektory Gaýhar Aldambergenova, Qurmanǵazy atyndaǵy Qazaq Ulttyq konservatorııasynyń rektory Arman Júdebaev, Qazaqstannyń halyq ártisteri Nurǵalı Núsipjanov, Lakı Kesoglý, belgili rejısserler Satybaldy Narymbetov, Baqyt Qaıyrbekov, Smaǵul Elýbaı, sondaı-aq M.Áýezov atyndaǵy Qazaq memlekettik akademııalyq drama teatrynyń dırektory Sábıt Ábdihalyqov, Jambyl atyndaǵy Memlekettik fılarmonııanyń dırektory Asqar Bóribaev, Chaıkovskıı atyndaǵy mýzykalyq kolledjdiń dırektory Birjan Hasanǵalıev, Abaı atyndaǵy Qazaq memlekettik Akademııalyq opera jáne balet teatrynyń dırektory Aıa Qalıeva, «Astana opera» teatrynyń bas dırektory Ǵalym Ahmedıarov jáne músinshi Sergebaev syndy elge belgili tanymal tulǵalar qatysty.

Odan ári Naýryz toıy tusaýkeser rásimi, úılený toıynyń rásimine ulasyp, bóbektiń tusaýyn Arystanbek Muhamedıuly kesip, qutty mereke qarsańynda bas qosyp, shańyraq kóterýge nıettengen júrgenovtik qos shákirtke qazaq óneriniń korıfeıi Asanáli Áshimov batasyn berdi.

Osylaısha júrgenovtikter Naýryz merekesin toılaýdyń jańa úlgisin usynyp, merekeniń qazaqy ónerin meıilinshetúrlendirip, folklorlyq-etnografııalyq aýqymnan meıirim men adamgershilikti dáriptegen izgilikti mereke dárejesine jetkizdi.

Mereke sońy salt-dástúrdi nasıhattaıtyn teatrlandyrylǵan kórinister men MýzART, Keshıý toby bastaǵan tanymal sheberlerdiń ónerine ulasyp, ulttyq oıyndarmen aıshyqtaldy.