Bul kúnderi Birikken kúres áleminiń bıýro múshesi, Azııa kúres federasııasynyń prezıdenti qyzmetin atqaryp júrgen dańqty balýan, Seýl men Barselona Olımpıadasynyń júldegeri, álem, Eýropa jáne Azııa chempıony, Azııa oıyndarynyń jeńimpazy, álem kýbogynyń eki dúrkin ıegeri, KSRO-nyń jeti dúrkin chempıony Dáýlet Turlyhanov osy jarys qarsańynda BAQ ókilderine bergen suhbatynda: «Osyǵan deıin Semeı qalasynda uıymdastyrylyp kelgen elimizge eńbek sińirgen jattyqtyrýshy Bolat Turlyhanovty eske túsirýge arnalǵan halyqaralyq týrnır sońǵy kezderi Almatyda ótip júrgeni barshańyzǵa málim. Bul – Birikken kúres áleminiń kúntizbesine engen Qazaqstandaǵy jalǵyz jarys. Bul týrnırde beldesýler tek Olımpıada baǵdarlamasyna engen salmaq dárejeleri boıynsha ǵana ótedi. Sondyqtan da aıtýly týrnırde kil myqtylar kúsh synasady. Solardyń arasynda Olımpıada men álem chempıonattarynda jeńis tuǵyryna kóterilgen ataqty balýandardyń da qarasy mol. Eger jigitterimiz osy baıraqty básekede bir altynǵa qol jetkizse, sonyń ózi bizdiń komanda úshin jaqsy nátıje bolar edi», – dep óz oıyn aıtqan edi.
Aıtqandaı-aq, bıylǵy týrnırdiń deńgeıi óte joǵary boldy. О́z elimizde, óz jerimizde ótip jatqan jarysta qazaqstandyq balýandar arasynan tek Ashat Dilmuhamedovtyń ǵana bas júldeni oljalaýǵa kúsh-jigeri men qarym-qabileti jetti. Rasynda da, 77 kılo salmaq dárejesinde beldesken Almaty oblysynyń ókili bul týrnırde keremet óner kórsetti. Taıaý kúnderi 33 jasqa tolatyn ardager balýan jıyrmanyń ishindegi jalyndy jastarmen qatar, talaı uly dúrmekterde atoı salǵan saqa sportshylardyń barlyǵyn jolynan yǵystyryp, jeńis tuǵyrynyń eń bıik satysyna kóterildi. Byltyrǵy jyly Azııa chempıony atanǵan qandasymyz fınalda 2018 jylǵy álem jáne 2014 jylǵy Eýropa chempıony, reseılik Aleksandr Chehırkınnen aılasyn asyrdy. Bilikti bapkerler men maıtalman mamandardan bastap, qarapaıym kórermenderge deıin Bolat Turlyhanovtyń kýbogy jolyndaǵy jarysta Ashattyń asqan sheberligine tánti bolyp, Alash jurtynyń mereıin asqaqtatqan qaısar ulǵa tik turyp qoshemet kórsetti.
Dál osy salmaqta beldesken Ashat Jańbyrovqa da jurt rıza boldy. Bastapqy básekelerdiń barlyǵynda jeńiske jetken jerlesimizdiń jartylaı fınalda joly bolmady. Esesine qola medal úshin tartysta ol Reseıdiń taǵy bir juldyzy, 2016 jylǵy álem chempıony, álem kýbogynyń eki dúrkin ıegeri Ramazan Abacharaevtan basym tústi.
60 kılo salmaq dárejesinde Aıdos Sultanǵalı men Álı Reza Nejatı beldesýge tıis edi. Alaıda jartylaı fınalda jaraqat alǵan qazaq sportshysy sheshýshi aıqasqa shyqpady. Osylaısha, Iran balýanynyń baǵy janyp, ol bas júldeni oljalady. Aıdos kúmis medaldi qanaǵat tutty. Olımpııa oıyndary men álem chempıonatynyń júldegeri, Eýropa chempıony, reseılik Mıngııan Semenov pen ózbekstandyq Islomjon Bahramov qolaǵa qol sozdy.
Jankúıerler 67 kılo salmaqtaǵy fınaldyq saıysty da kóre almady. Rıo Olımpıadasynyń qola júldegeri, grýzııalyq Shmagı Bolkvadze jaraqatyna baılanysty boz kilemge shyqpady. Nátıjesinde Eýropa birinshiliginiń júldegeri, reseılik Zaýr Kabaloev birinshi oryndy ıelendi. Irandyq Muhammed Rezaı men ózbekstandyq Aram Vardanıan úshinshi satyǵa taban tiredi.
87 kılo salmaqta reseılik Bekhan Ozdoevqa teń keler eshkim tabylmady. Eýropa birinshiliginiń kúmis júldegeri aqtyq aıqasta ırandyq Ramın Tanerısartangty tize búktirdi. Belarýsııanyń qos myqtysy – Mıkolaı Stadýb pen Radık Kýlıev qola medaldi qorjynǵa saldy.
97 kılo salmaq dárejesinde Reseıdiń úsh apaıtósi jeńis tuǵyryna kóterildi. Aleksandr Golovın kúmis medaldi moınyna ilse, Nıkıta Melnıkov pen Danıla Sotnıkov qola júldeni enshiledi. Al solardyń barlyǵynan Artýr Aleksanıannyń shoqtyǵy bıik boldy. 2012 jyly London Olımpıadasynda kúmis, 2016 jyly Rıo Olımpıadasynda altyn alyp, úsh ret álem chempıonaty jáne tórt ret Eýropa birinshiliginde bas júldeni ıemdengen Armenııanyń ataqty balýany Almatyda da qarsylas shaq keltirgen joq.
– Almatydaǵy aıqastardyń eshbirinde jeńis maǵan ońaılyqpen kelgen joq. Barlyq jekpe-jekte kóp kóp ter tóktim. Bul jaǵdaı Bolat Turlyhanov týrnıriniń deńgeıi asa joǵary bolǵanyn ańǵartsa kerek, Endi jeńisti jolymdy Nur-Sultanda jalǵastyrsam deımin. Qyrkúıek aıynda qonaqjaı Qazaq eliniń astanasynda jalaýy jelbireıtin álem chempıonatynda bas júldeni oljalaýdy kózdep otyrmyn, – dep Artýr Aleksanıan aqtaryla sóıledi.
Alyptardyń aıqasynda Belarýstiń betkeustary Kırıll Hrıshchankanyń asyǵy alshysynan tústi. Fınalda ol reseılik Vıtalıı Shýrge shań qaptyrdy. Qos qola medaldi ırandyq Shahab Ghoýrehjılı men grýzııalyq Iаkob Kadjaıa ıelendi.
Jarys jeńimpazdary men júldegerlerine dástúrli medaldar men dıplomdardan bólek, aqshalaı syılyqtarǵa tabys etildi. Bir ǵajaby, osy týrnırdi tamashalaýǵa kelgenderdiń arasynda ataǵy alysqa jaıylǵan ardager balýandardyń qarasy mol boldy. Eki kúnge sozylǵan básekeler barysynda Jaqsylyq Úshkempirov, Baqtııar Baıseıitov, Georgıı Sýrsýmııa, Áset Mámbetov, Ermek Kóketov, Áset Imanbaev syndy otandastarymyzdan bólek, shet memleketterden kelgen Kamandar Madjıdov pen Sergeı Demeshkeevıch bastaǵan grek-rım kúresiniń has sheberlerin de kózimiz shaldy. Sondaı-aq, Bolat Turlyhanovtyń zaıyby, Batyr ana Márzııa Aıtbaıqyzy, uldary – respýblıkalyq aýyr atletıkanyń qurmetti prezıdenti Qaırat Turlyhanov pen dańqty balýan Dáýlet Turlyhanov jáne taǵy basqa elge eleýli tulǵalar aıtýly jarysty basynan aıaǵyna deıin tamashalady.
ALMATY
