Semeıdegi jańa medısınalyq nysan JCI standarty boıynsha jobalanyp, jabdyqtalǵan. Gıbrıdti zaldy Ulttyq Neırohırýrgııa ǵylymı ortalyǵy basqarmasynyń bastyǵy, elimizdiń úzdik neırohırýrgy, professor Serik Aqsholaqov ashty. Jáne birden operasııa jasaýǵa bettedi. Serik Aqsholaqov neırohırýgııa ortalyǵyndaǵy qan-tamyrly neırohırýgııa bóliminiń meńgerýshisi Erbol Mahambetovpen jáne Semeıdegi jedel medısınalyq járdem kórsetý aýrýhanasyndaǵy endevoskýlıarly hırýrgııa jáne gıbrıdti operasııalyq bóliminiń meńgerýshisi Aıbol Maralbaevpen birge tórt saǵat boıy osynda shuǵyl kelip túsken naýqastyń basyndaǵy qaterli isikke kúrdeli operasııa jasap, ony ári qaraı ashyq túrde alyp tastaý tásilin qoldandy. Isikti nárlendirip turǵan tamyrlardy joıdy.
- Bundaı operasııa biz úshin budan buryn birneshe kúnge sozylǵan eki bólimnen turatyn edi,-dedi elimizdiń bas neırohırýrgy Serik Aqsholaqov,-mysaly birinshisinde, isikti ósirip bara jatqan tamyrlardy endosvoskýlıarly túrde alyp tastaımyz, ekinshisinde birneshe kún ótken soń, sol qaterli isiktiń ózin alyp tastaıtynbyz. Ol aralyqta naýqasty da haly qıyndap ketýi múmkin. Al búgin, myna gıbrıdi operasııa jasaý zalynyń ashylýyna oraı, men shaǵyn ınvazıvti túrde, naýqasqa kóp zııan shektirmeı eki operasııany birden jasadym. Shyny kerek, Qazaqstanda eshbir jerde ázirshe joq gıbrıdti operasııany jasaý barysynda, jańa qural-jabdyqtyń kómegimen naýqastyń ómirin alyp qalǵanyma erekshe qýanyshtymyn. Gıbrıdti operasııalyq zal jergilikti oblys turǵyndaryna joǵary tehnologııalyq medısınalyq kómek kórsete alady. Naýqastar shetke shyqpaı-aq, óz elimizde, Semeıde emdelip shyǵady. Bul árıne, oblys ákimi Danıal Ahmetovtyń qoldaýy arqyly júzege asyp jatqan joba. Oblys basshysy medısına dárigerleriniń álemdik deńgeıde jańa jetistikterge jetýine múmkindik jasap otyr.
Shynynda da oblystyń densaýlyq saqtaý salasyndaǵy keshendi damý jobalaryna oraı 2018 jyly О́skemen qalasyndaǵy oblystyq medısınalyq mamandandyrylǵan ortalyqta Robotohırýrgııa jáne transplantologııa Ortalyǵy ashylǵan edi. Al Aıagóz ben Altaı qalalarynda Ulttyq neırohırýrgııa ortalyǵynyń ádistemelik kómegi arqyly ekinshi deńgeıli ınsýlt ortalyqtary iske qosyldy. Semeı qalasyndaǵy Jedel medısınalyq járdem ortalyǵynda Ulttyq Travmotologııa jáne ortopedııa ǵylymı-zertteý ınstıtýtymen birlesip Polıtravma jáne ortohırýrgııa Ortalyǵy da tusaýyn kesti.
Al jańa jobaǵa kelsek, bul gıbrıdti operasııa zaly hırýrgııa salasynyń kóptegen salalarynyń basyn biriktiredi. Bul operasııa jasaıtyn klassıkalyq bólmeden ereksheligi arnaıy úlken zal ekendiginde. Kóp júıeli blokta jańa deńgeıli tehnologııalar men qural-jabdyqtar ashyq jáne shaǵyn ınvazıvti laparoskopııalyq túrdegi magnıtti-rezonanstyq tomografııa, hırýrgııalyq rentgen júıeleri, ÝDZ salasy, beınebaqylaý júıesi arqyly kúrdeli operasııany sapaly jasaý múmkindigi tolyq qamtylǵan.
Semeıdegi gıbrıdti operasııanyń ótý barysyna tikeleı qatysqan oblys ákiminiń orynbasary Ásem Núsúpovanyń aıtýynsha, bundaı jańashyl tehnologııa Semeı óńirin, qala turǵyndaryn joǵary medısınalyq kómekpen tolyq qamtamasyz etýge múmkindik beredi.
- Semeıdegi Jedel medısınalyq járdem kórsetý aýrýhanasy Semeı óńiriniń 700 000 turǵynyna medısınalyq kómek kórsetedi,-dedi oblys ákiminiń orynbasary Ásem Núsúpova,- osylaısha bul aımaqtyń stasıonarly kómeginiń 40 paıyzyn jabady. Jyl saıyn 24 000 turǵyn emhananyń qabyldaý, dıagnoz qoıý bóliminen tekserilýden ótip, onyń 14 000 naýqasy aýrýhanaǵa joldanady. Bundaı kóp mólsherdegi syrqattar jańa gıbrıdti operasııalyq zaldyń jumysynyń kerek ekendigin rastaıdy. Adamdarǵa shuǵyl túrde keshendi medısınalyq kómek kórsetýge tolyq múmkindik bar. Ásirese, qan tamyrlary júıesiniń buzylýy kezinde, túrli kóp deńgeıli jaraqattarda, ınsýlt pen ınfarktterde jańa tehnologııalardy iske qosý arqyly emdeýge bolady. Gıbrıdti operasııa jasaý zalynyń jobasy 2,3 mlrd.teńge bólinse, al bul zaldyń qural-jabdyǵyn alýǵa 1,7 mlrd teńge jumsaldy. Bul qarjy oblystyq bıýdjetten jáne bıýdjetten tys qorlardan berilip otyr. Qural-jabdyqtar eýropalyq jáne amerıkalyq sapa kórsetkishteriniń sońǵy úlgisi. Bul jabdyq arqyly QR Densaýlyq saqtaý mınıstrliginiń qoldaýymen biz Shyǵys Qazaqstan oblysynyń turǵyndaryna kepildi medısınalyq kómek kórsetý baǵdarlamasy arqyly tegin túrde emdeý, operasııa jasaý, saýyqtyrý sharalaryn jasaı alamyz.
Qazirgi ýaqytta aýrýhanada gıbrıdti operasııa jasaý bólmesinde jumys isteý úshin maman dárigerler toby daıyndalǵan. Operasııalar jasaýǵa oraı aldyn ala daıyndalǵan 20 shaqty dáriger óz isine tez arada kirise alady. Jylyna 3000 operasııa ótedi dep josparlanýda. Sebebi bul zal ashylmastan buryn dáriger mamandar daıyndaý edáýir erterek qolǵa alyndy. ShQO Densaýlyq saqtaý basqarmasynyń basshysy Ilııas Muhamedjannyń aıtýynsha, Semeı qalasynyń Jedel medısınalyq járdem kórsetý aýrýhanasy 2017 jyldan bastap, dárigerlerdiń biliktiligin kóterý úshin úsh deńgeıli oqytý júıesin qolǵa alyp otyr. 2017 jyly oblys ákimshiligi buǵan 3,2 mlrd teńge bólgen. Osy joba aıasynda Anglııada 3 aı boıy 19 maman mýltı tártip toby baǵytynda bilimderin kóterip keldi.
Buǵan rentgendi hırýrgııa, anestezıologııa, travmatologııa, nevrologııa, kardıologııa jáne sáýlemen emdeý mamandary da kirdi. Jáne respýblıkalıaq ortalyqtarda neırohırýrgııa, ıntervensııalyq kardıologııa, rentgen-zerthanashy mamandary da oqytyldy. Jalpy gıbrıdti operasııaǵa jumys isteýge 43 maman daıarlanǵan. Bıyl shetelderde oqytý baǵdarlamasy jalǵasyn tabady. Soǵan oraı qyrkúıek aıynda biliktilikterin kóterip, bilim alý úshin Semeı qalasyndaǵy Jedel medısınalyq járdem kórsteý aýrýhanasynan shetelge 12 maman attanady.
Raýshan NUǴMANBEKOVA,
«Egemen Qazaqstan»
sýretti túsirgen avtor
SEMEI
