Úı gúlderin ósirýshiler 15 jyldan astam ýaqyttan beri osy kitaphanada jınalady. Otyrystardyń barysynda aldymen gúlder áleminiń jańalyqtary talqylanady. Qatysýshylar gúl suryptarymen almasady, gúl ósirý, landshaftyq dızaın boıynsha jańa kitaptarmen tanysyp, bólme ósimdikteriniń jańa suryptaryn kóredi.
Gúl ósirýshi Elena Aseeva aýyryp qalǵan gúlderdi qalpyna keltirý, gúlder men ósindilerdi qaıta otyrǵyzý, sapaly topyraq tańdaý, durys jaryqtandyrý jáne qalypty sýarý sııaqty sheberlik synybyn jáne tájirıbelik sabaqtar ótkizedi.
Bıolog mamandardyń aıtýynsha, úı gúlderimen jıi «sóılesip» júrse, gúlder bizdi tyńdaıdy, án áýenderi de erekshe áser beredi.
– Ádemi gúldeıtin shegirgúlder, epıssııalar, jańa gvıneıalyq balzamınder, «Jańbyr áýeni», «Estel», «Rapsodııa-Kora», fýksııalar, sándik-japyraqty gúlder ósirgen jaqsy. Qazir shetten jetkiziletin úıde ósiriletin gúlderdiń túr-túri bar. Ár gúldiń kútimi ártúrli. Biri kún kózin jaqsy kórse, endi biri, mysaly, drasena tek kóleńkede ósedi, – deıdi «Fıalochka» áýesqoı gúl ósirýshiler klýbynyń jetekshisi Elena Aseeva.
Al «Fıalochkanyń» kezekti otyrysyna kelgen áıelderdi jazǵy ýaqytta úı gúlderin qalaı sýarý, qalaı kýtý kerektigi mazalaıdy.
– Jaz kezinde úı gúlderin ystyqtan saqtaý úshin salqyn jerge qoıǵan durys. Bólmeni múmkindiginshe salqyndatý qajet. Gúlderdi salqyn sýmen búrkip, ósimdikterdiń tamyr júıesi zardap shekpeý úshin az-azdan sýarý kerek, – dedi Elena Aseeva.
Gúl ósirýshilerge «Iаn menýet», «Qar edelveısi», «Pırattar qazynasy», «Tropıkana», «Ákesiniń qyzy Dasha» atty jańa fıalka sorttaryn ósirýdi usyndy.
PAVLODAR
