Qazir oblysta 655 mektep bar bolsa, bıyl osy bilim ordalarynda 193 myńnan astam oqýshy bilim almaq. Al jańa oqý jylynda óńir mektepteriniń 1 synybyna 21 myńnan astam oqýshy barady dep kútilýde (bul – ótken jylǵy kórsetkishten 1 myńǵa artyq). О́kinishke qaraı bıyl oblysta 5 oqý oshaǵy (Jarma aýdanynda – 2, Katonqaraǵaı aýdanynda – 3 bastaýysh mektep) bala sanynyń jetkiliksizdigine baılanysty jabylmaq. Esesine, О́skemende 2 myń oryndyq, Tarbaǵataı aýdanynyń Aqjar aýylynda 600 oryndyq 1 mektep paıdalanýǵa beriledi. Oblystaǵy mektepterge oqýlyqtar men oqý-ádistemelik keshenderdi satyp alýǵa 2 mlrd 383 mln teńge bólinipti. Bul qarajatqa 1 mln 58 myń 730 dana oqýlyq satyp alynady. Búginde aımaqtaǵy mektepterde 22 526 pedagog eńbek etedi. Bıyl 237 jas maman jumysqa kirispek. «14 tamyzdaǵy málimetterge súıensek, oblystaǵy 19 aýdannyń oqýshylarynyń 70 paıyzy mektep formasymen qamtamasyz etilgen. Endi josparǵa sáıkes, 25 tamyzǵa deıin óńirdegi kóp balaly jáne az qamtylǵan otbasylarda tárbıelenip jatqan balalarǵa mektep formalary beriledi. Bıyl «Mektepke –jol» aksııasy jyl sońyna deıin jalǵasady. Atalǵan aksııa aıasynda 33 myńnan astam oqýshyǵa kómek kórsetiledi. Búginde 143 myń balaǵa bıýdjettik jáne bıýdjetten tys qarajattan 156 mln 741 myń teńge somasyna kómek berildi», deıdi Ásem Núsipova.
О́ńirdegi mektebi joq 307 aýyldyq okrýgtiń 3695 oqýshysy jaqyn mańdaǵy eldi mekenderdiń mektepterine arnaıy bólingen 163 avtobýspen tasymaldanatyn kórinedi. Osy oqýshylardyń ishinde 2948 bala kún saıyn sabaq bitken soń úılerine jetkizilse, 750 oqýshy mektep janyndaǵy ınternattarda turady dep josparlanǵan. «Bıyldan bastap jalpyǵa mindetti bilim berý qorynan áleýmettik jaǵynan az qamtylǵan jáne kóp balaly otbasylardan shyqqan balalardy qoldaý maqsatynda 2 mlrd teńge qarjy qarastyrylǵan. Onyń 625 mıllıon teńgesi 33 582 balaǵa mektep formasyn alyp berýge jumsalmaq» deıdi Saırangúl Jumadilova.
Shyǵys Qazaqstan oblysy
