Áýe shabýylyna qarsy qorǵanys áskerleri men avıasııasyna shartty qarsylastyń nysanalaryn joıý jóninde tapsyrma berildi. Mı-35M jaýyngerlik tikushaqtary ozyq radıotehnıkalyq bólimsheler, Sý-30SM joıǵysh ushaqtary, basqarý pýnktteri, áýeaılaqtar men shartty qarsylastyń áýe shabýylyna qarsy qorǵanys quraldary boıynsha áýe soqqysyn jasady, al Sý-25 shabýyldaýshy materıaldyq-tehnıkalyq qamtamasyz etý qoımalaryn joıdy. Jappaı shabýyldy MıG-31B joıǵysh ushaqtary jalǵastyrdy. Búgingi tańda bul álemdegi eń jyldam jaýyngerlik ushaqtardyń biri. Joıǵysh ushaq saǵatyna 3000 km jyldamdyqqa deıin ushyp, stratosfera qabatyna kóterile alady.
Jerdegi jáne áýedegi nysanalardy joıý úshin avıasııa «áýe-jer» jáne «áýe-áýe» klasyndaǵy basqarylatyn jáne basqarylmaıtyn avıasııalyq zymyrandardy, retke keltiriletin avıasııalyq jáne jarqynshaqty-fýgasty bombalardy qoldandy. Áýe urysyn júrgizýden basqa, ushqyshtar ssenarıı boıynsha apatqa ushyrap, isten shyqqan ushaq ekıpajyn qutqarýdy pysyqtady.
Áýe shabýylyna qarsy qorǵanys áskerleri oqý-jattyǵýdyń belsendi fazasy barysynda qanatty zymyranǵa tosqaýyl jasaýdy, sondaı-aq S-200, S-300, S-75, S-125, «Krýg» jáne «Kýb» zenıttik-zymyran keshenderiniń jaýyngerlik múmkindikterin pash etti.
Áskerı qyzmetshilerdiń daıyndyq deńgeıi men sheberlikterine baǵa berýge kelgen Qorǵanys mınıstri Nurlan Ermekbaev qatysýshylardy qarsy alyp, Armenııa, Belarýs, Reseı, Tájikstan, Qyrǵyzstan jáne О́zbekstan Qarýly Kúshteriniń basshylyǵyna alǵys bildirdi. Sonymen qatar sheberliktiń joǵary deńgeıin atap ótip, dostastyq armııalarynyń áskerı qyzmetshilerine ashyq aspan tiledi.
«Jaýyngerlik dostastyq-2019» halyqaralyq oqý-jattyǵýy Reseı men Qazaqstannyń áskerı polıgondarynyń aýmaǵynda ótkizilgenin esterińizge sala keteıik.
«Saryshaǵan» polıgonyndaǵy oqý-jattyǵýǵa Áýe qorǵanysy kúshteriniń barlyq áskerı bólimderi, áýe shabýylyna qarsy qorǵanystyń tehnıkasy men qarý-jaraǵy, Qazaqstan Áskerı-áýe kúshteriniń avıasııasy tartyldy. Odan basqa, atalǵan oqý-jattyǵýǵa alǵash ret Qyrǵyzstan ÁShQQ áskerleriniń jaýyngerlik eseptoptary qatysty.
«Egemen-aqparat»
