Aıtýly tulǵanyń alys-jaqyn shetelderden kelgen áriptesteri men shákirtteri: Ázerbaıjan Ulttyq Ǵylym Akademııasynyń prezıdenti, geologııa jáne geofızıka ınstıtýtynyń dırektory Akıf Alızade, Reseı Ǵylym Akademııasynyń akademıgi Vıktor Klıpko, Tájikstannan kelgen akademık Botyrjan Abdýllaev, Novosibirlik ǵulama Aleksandra Levıgeva, ýfalyq professor Sabır Mustafın jáne basqalar Patshaıym Tájibaıqyzynyń Qazaqstandaǵy lıtologııa ǵylymynyń negizin qalaǵanyn, Jezqazǵan, Batys Qazaqstan, Qumkól, taǵy basqa ólkelerdegi jer asty baılyǵyn el ıgiligine jaratýǵa aıanbaı atsalysqanyn, QR Joǵarǵy Keńesiniń depýtaty, Vıse-spıker mindetterin minsiz atqaryp, óziniń asa úlken bedelin el ómirine qatysty problemalardy sheshýge arnaǵanyn, sol maqsatpen KSRO Mınıstrler Keńesiniń tóraǵasy A.Kosygınniń qabyldaýynda bolǵanyn, ol qabyldaýdyń Qazaqstannyń ǵana emes, geologııa ǵylymynyń damýyna qýatty serpin bergenin asqan rızashylyqpen eske aldy...
Mereıtoıdyń birinshi bólimi – saltanatty májiliste sóılegen QR Ulttyq ınjenerlik akademııasynyń vıse-prezıdenti Nadır Nadırov, kórnekti memleket qaıratkeri, ǵalymnyń dosy Bıjamal Ramazanova, Túrkistan oblysy Tóle bı aýdanyndaǵy Patshaıym Tájibaeva atyndaǵy №3 mekteptiń dırektory Qalıma Ijanova, ǵalymnyń qyzy, akademık, Ál-Farabı atyndaǵy Qazaq ulttyq ýnıversıtetiniń oqytýshysy, Qurmetti kafedra meńgerýshisi Quralaı Aqqoshqarova, Shymkent qalasyndaǵy «Aıǵaq» telearnasynyń bas dırektory, Túrkistan oblystyq máslıhatynyń depýtaty Dýlat Ábish, jazýshy QR Memlekettik syılyǵynyń laýreaty Sábıt Dosanov, Qazyǵurt aýdanyndaǵy Patshaıym Tájibaeva atyndaǵy mekteptiń oqý isiniń meńgerýshisi Altynshash Qanylıeva, Almaty qalasynyń ákimi Baqytjan Saǵyntaevtyń quttyqtaý hatyn tapsyrǵan ákimniń keńesshisi Danııar Álıev, Almaty qalasy Bostandyq aýdany ardagerler keńesiniń tóraǵasy Hamıt Birjanov, t.b. Patshaıym Tájibaevanyń ǵylymdaǵy erligi men eren qaıratkerligi jaıly oı tolǵap, onyń jan dúnıesiniń kirshiksiz tazalyǵyn, asqan adamgershiligi jaıly tebirene syr shertti. Aqyn Myńbaı Rásh Patshaıym Tájibaeva jaıly óleńin shabyttana oqyǵanda halyq dúrkirete qol soqty. Áıgili kúıshi, kompozıtor Shámil Ábiltaev keshti ánmen kómkerdi.
Uly ǵalymǵa zor iltıpat, ystyq yqylaspen ári yrymdap balalarynyń atyn bergen ata-analar da kóp. Solardyń biri – stýdent Patshaıym Batyrbekovanyń tereń sezimmen tebirene aıtqan qysqa da nusqa sózi kóptiń kóńilinen shyqty.
Mereıtoıdyń ekinshi bóliminde áıgili ǵalym jaıly «Ee ımıa – Patshaıym» – «Patshaıym dese Patshaıym» atty qazaq, orys tilderinde jaryq kórgen kitaptyń tusaýy kesildi. Bul Patshaıym Tájibaeva jaıly budan buryn jaryq kórgen eki kitaptyń jalǵasy. Munda ǵalym jaıly áserli, mazmundy estelikter toptasqan.
Mereıtoıdyń úshinshi bólimi – «Asa kórnekti ǵalym Patshaıym Tájibaevanyń Qazaqstandaǵy geologııa ǵylymyna qosqan úlesi» taqyrybyndaǵy halyqaralyq ǵylymı konferensııada sheteldik jáne qazaqstandyq ǵalymdar geologııa ǵylymynyń jetistikteri men problemalary jaıly oılarymen bólisti.
Bul ádettegi mereıtoılardyń biri emes, aıtary anyq, boıaýy qanyq, taǵylymy mol, tárbıelik máni zor, asa áserli kesh boldy.
