Búginde oblystyń medısınalyq mekemelerinde 4 756 dáriger jáne 14961 meıirbıke eńbek etedi eken. Iаǵnı, 10 myń adamǵa shaqqandaǵy ortasha medısınalyq qyzmet kórsetýmen qamtý 73,8 paıyz bolsa, joǵary bilimdi dárigerdiń úlesi 23,2 paıyz shamasynda. Kadr jetispeýshiligin zerdeleý barysynda aımaqta 122 jalpy tájirıbe dárigeri, 28 akýsher-gınekolog, 24 otashy, 18 anestezıolog-reanımatolog, 13 neonatolog, 13 nevrolog jáne 8 onkolog dárigerdiń orny bos turǵany anyqtalǵan.
Árıne oblystyq densaýlyq saqtaý salasynyń basshylyǵy bul máseleni sheshýde qol qýsyryp otyrǵan joq. Bıyl 173 jas maman emhanalar men aýrýhanalarǵa jumysqa turǵan. Onyń ishinde 97 medısına qyzmetkeri aýyldyq jerdegi mekemelerge qabyldanypty.
– Biz óz tarapymyzdan maman jetispeýshiligin boldyrmaý úshin barlyq múmkindikti paıdalanyp otyrmyz. Jergilikti ákimdermen birlesip, jumysqa turǵan jas mamandardy ýaqytsha baspanamen qamtýǵa, alǵashqy kóterme járdemaqy tóleýge, úı satyp alýǵa jeńildetilgen nesıe berýge kómektesemiz. Bıyl jumysqa turǵan jas mamannyń barlyǵyna 1 mln teńgeden kóterme aqy tóledik. Jalpy, dárigerlerdiń jetispeýshiligi saladaǵy áleýmettik qoldaýdyń álsizdiginen emes, adamı faktorǵa da baılanysty. Iаǵnı, tájirıbeli mamandar zeınetke shyǵyp jatyr, olardyń ornyn jas býyn toltyryp úlgermeýde. Medısına mamany bolý úshin joǵary oqý ornynda 10 jylǵa deıin bilim alýǵa týra keledi, odan keıin de biraz tájirıbe jınap, myqty maman bolǵansha ýaqyt ótip ketedi. Demek, dárigerlik qyzmetke armanyna adal, mamandyǵyna qulaı berilgen adam ǵana keledi, – deıdi oblystyq densaýlyq saqtaý basqarmasynyń basshysy Baýyrjan Ysqaq.
Al aımaqtaǵy dáriger tapshylyǵyn sheshý úshin oblystyq bıýdjetten 18 mln teńge qarjy qaralyp, talapty jastardyń joǵary oqý oryndaryna túsýine jaǵdaı jasalǵan. Atap aıtqanda, 47 bolashaq dáriger Almaty qalasyndaǵy medısınalyq bilim beretin oqý oryndarynda oblystyń esebinen oqyp jatyr. Onyń ishinde 26 stýdentke oblys ákiminiń granty taǵaıyndalǵan. Bıyl oqý shyǵyndary úshin bólingen qarjy taǵy 26,5 mln teńgege kóbeıdi. Keler jylǵy talapkerler úshin de 4,6 mln teńge qarastyrylyp, bıýdjet esebinen oqytý isi jalǵasyn tabady.
Sondaı-aq Almaty oblysynda turǵylyqty jeri boıynsha emhanaǵa tirkelgen adamdardyń úlesi 90 paıyzǵa jetti. Buǵan deıin aımaqta 100 214 turǵynnyń turaqty tirkeýi joq ekeni synǵa alynǵan bolatyn. Qazir bul tizim 35 306 adamǵa deıin qysqaryp, 64 908 turǵyn medısına mekemeleriniń qaraýyna jazyldy. Turǵyndardyń densaýlyq saqtaý mekemelerine tirkeýge turýy dárigerlik kómek alýdyń máselesin sheshýge yqpal etedi. Ásirese bıyldan bastap iske qosylatyn mindetti áleýmettik medısınalyq saqtandyrý júıesi arqyly em-dom alý qoljetimdi bolmaq. Iаǵnı, «Mindetti áleýmettik-medısınalyq saqtandyrý» júıesi iske qosylǵannan keıin, naýqas tirkelgen emhanaǵa qaralǵan kezde onyń jarna tóleýi mańyzdy orynǵa shyǵady.
– Turǵyndardyń tirkeýge turýy ózderi úshin ońtaıly. Aldaǵy jyldan medısınalyq qyzmet kórsetý jańa erejege saı júredi. Osy jerde em alýshynyń mindetti jarnany tólegeni basty orynǵa shyǵady. Árıne bul máseleniń áli de jetildiretin tustary bar. Kedergilerdi is barysynda eńseremiz. Sondyqtan tirkelý men jarna tóleý ár adam úshin mindetti bolýy tıis, – deıdi oblystyq densaýlyq saqtaý basqarmasynyń basshysy Baýyrjan Ysqaq.
Almaty oblysy
