Jıynda talqylanatyn taqyryptar men bas qosýdyń maqsaty jaıly kópshilikti habardar etken Qoljazbalar jáne sırek kitaptar ulttyq ortalyǵynyń dırektory Nurlan Erejepov: «Eń áýeli Elbasy N.Nazarbaevtyń «Uly dalanyń jeti qyry» maqalasynda aıtylǵandaı, búgingi tól tarıhymyzǵa oń kózqaras kerek ekenin jetkizip, onyń ishinde reseılik shyǵystanýdyń iri ókilderi – V.V.Bartold, S.E.Malov, V.V.Radlov t.b. oqymystylardyń eńbegi ult tarıhyn túgendeýde úlken septigin tıgizip kele jatqanyn atap ótti.
Jalpy alǵanda HIH ǵasyrdyń ekinshi jartysynda qalyptasqan reseılik shyǵystaný áskerı jáne ǵylymı maqsatta júrgizildi. Ásirese, shyǵystaný boıynsha patshalyq mekemelerge jetkiziletin maǵlumattar: jazbahat, baıandama, sholý, arnaýly sıpattama, geografııalyq nysandar koordınaty, syzba-karta... sııaqty paıdaly málimetter, búgingi tańda ótkenimizdi saralaýǵa zor úlesin tıgizip otyr.
Osy oraıda akademık Bolat Kómektiń reseılik shyǵystaný máselesi jaıly aıtqan pikirine qulaq túrsek, bul ilimdi ıgerý barysynda akademık V.V.Bartoldtyń eńbegi ózine baǵyt-baǵdar bolǵanyn, ásirese, kımektaný máselesinde ataqty oqymystynyń 11 derekkózin paıdalanǵanyn, tipti ǵalymnyń nazaryna ilikpegen 70-ge tarta tyń málimet tapqanyn, bulardyń bári ult tarıhynyń beles-bederin aıqyndaıtyn qundy dúnıe degen paıymyn vebınar arqyly aıta ketti. Taqyryp boıynsha baıandama jasaǵan tanymal dıplomat, professor Saılaý Batyrshauly reseılik shyǵystaný ǵylymynyń tól tarıhymyz ben mádenıetimiz úshin alatyn orny erekshe ekenine, bul sala keńestik kezeńde toqyraýǵa ushyrap, tipti qaǵajaý kórgenin dálel-dáıekpen aıtyp: «Táýelsizdiktiń arqasynda elimizde shyǵystaný mamandaryn daıyndaıtyn oqý oryndary kóbeıdi. Qazirgi tańda ál-Farabı atyndaǵy QazUÝ men L.N.Gýmılev atyndaǵy EUÝ, Abylaı han atyndaǵy Halyqaralyq qatynastar jáne álemdik tilder ýnıversıteti, Abaı atyndaǵy Qazaq ulttyq pedagogıkalyq ýnıversıteti qatarly oqý oryndarynda: arab, parsy, qytaı, koreı, japon, ýrdý, hındı taǵy basqa tilder jáne shyǵys halyqtarynyń tarıhy oqytylyp jatyr. Bul quptarlyq is» dedi.
Sonymen qatar «Eýrazııa ulttyq ýnıversıtetinde shyǵystaný mamandaryn daıarlaý» taqyryby boıynsha aqparat aıtqan kafedra meńgerýshisi Aqjigit Álibekuly, atalmysh oqý orny qazirgi tańda arab, parsy, qytaı, japon, koreı tilderine maman daıarlaýmen qatar, kelesi jyldan bastap mońǵoltaný baǵytynda ilim úıretetini jaıly aıtyp ótti. Bul is ulyq ulys Altyn Ordanyń 750 jyldyq merekesi, sonymen qatar irgeli ımperııanyń negizin qalaýshy Joshy han men onyń urpaqtarynyń mıssııasyna qatysty otandyq tarıhshylar aldynda mońǵoltanýdyń jańa kezeńi týyp tur degen paıymda tujyrymdaldy.
Basqosý barysynda shyǵystanýshy maman Samal Tólekbaeva, Qoljazbalar jáne sırek kitaptar ulttyq ortalyǵynyń ǵylymı qyzmetkerleri Zadash Dúkenbaeva, Almat Absalyqov, Raıymjan Muzaffarovtardyń mazmundy baıandamalary tyńdaldy.
