Qaraǵandynyń «Shahter» komandasynyń Eýropa lıgasyndaǵy toptyq kezeńde oınaıtyn qarsylastary anyqtaldy. Ol Monakodaǵy Grimaldi Forum kongress-ortalyǵynda búgin ótken jerebe qorytyndysy boıynsha belgili boldy. Bul týraly Vesti.kz habarlady.
Qaraǵandylyqtar toptyq kezeńde endi Gollandııanyń AZ, Grekııanyń PAOK jáne Izraıldiń «Makkabı» (Haıfa) komandalarymen kúsh synasady.
Eske sala keteıik, bıylǵy eýropalyq komandalyq týrnırler maýsymyn kenshiler klýby Chempıondar lıgasynda bastaǵan edi. Onda úsh kezeńnen ótken ol pleı-off shaıqasynda Shotlandııanyń «Seltık» komandasymen kezdesti. Qarsylastaryn óz alańynda 2:0 etip tize búktirgen «Shahter» burnaǵy kúni Glazgoda ótken qarymta oıynda 0:3 esebimen utylýǵa májbúr boldy. Osylaısha eki kezdesýdiń qorytyndysy boıynsha qarsylasyna jol berip aldy.
Buǵan qosatynymyz, ÝEFA Eýropa lıgasynyń fınaldyq oıyny 2014 jyldyń mamyr aıynda Italıanyń Týrın qalasynyń «Iýventýs» stadıonynda ótedi.
Damır Qojamqul.
