Bul sharaǵa elimizdegi barlyq teatrlar, kitaphanalar, konsert zaldary men ózge de óner oshaqtary atsalysyp otyr. Qurmanǵazy atyndaǵy Qazaq ulttyq konservatorııasynyń ujymy erekshe kózge túsip júrgenin atap aıtqan jón. Konservatorııa ustazdary birinen biri jalǵap, túrli chellendj jasap qana qoımaı, tutas onlaın konsertter de uıymdastyrdy. Sonyń ishinde kúni keshe týǵanyna 95 jyl tolǵan kúıshi, kompozıtor, dırıjer, KSRO halyq artısi, Qazaqstannyń Halyq qaharmany Nurǵısa Atabaıuly Tilendıevti eske alý sharalaryna erekshe oryn berildi. Konservatorııa rektory Arman Júdebaev bastaǵan ujym Nurǵısa Tilendıevtiń shyǵarmalaryn oınap, Qurmanǵazy orkestriniń konsertin kópshilikke usyndy.
Osy sharalardyń ishindegi kópshilik kóńilinen shyǵyp, kórermenin baýraǵan jobanyń biri – «Karantındegi juldyz». Elimizge belgili óner juldyzdarynyń onlaın konsertin myńdaǵan adam tamashalap, jyly lebizderin bildirýde. О́ner juldyzdary án salyp, kúı shertip qana qoımaı, kórermendi mazalaǵan saýaldarǵa da jaýap berýde.
Mádenıet jáne sport mınıstrliginiń bul jobasyna «Qazaqtelekom» AQ qoldaý bildirdi. YouTube jelisindegi onlaın konsert QR Mádenıet jáne sport mınıstrligi men Qazaqkonserttiń ıýtýb paraqshalarynda jarııalanady. Onlaın konserttiń formaty ártúrli. Onda folklor da, estrada da, klassıkalyq jáne aspaptyq konsertter de bar.
Jobany alǵashqy bolyp Jubanysh Jeksenuly bastady. Jubanysh ansambldiń súıemeldeýimen ǵana emes, dombyramen de án saldy. «О́kinbe sen», «Muhıda shaıban», «Nurıkamal», «Oılamańdar, jigitter» syndy ánderdi shyrqaǵan Jubanyshtyń onlaın konsertin 55 myńǵa jýyq adam tamashalapty.
«Karantındegi juldyz» konsertine Qazaqstannyń Halyq ártisi Roza Rymbaevanyń erekshe daıyndyqpen kelgenin atap ótken oryndy. Kompozıtor Erkin Yntybaev pen óziniń uly Álı Oqapovtyń súıemeldeýimen eki saǵatqa jýyq án salǵan Roza Rymbaevanyń konsertin bir ǵana ıýtýb jelisinen 77 myńnan astam kórermen tamashalapty. Kileń lırıkalyq, mahabbat ánderin shyrqaǵan Roza Qýanyshqyzy Abaıdyń «Aıttym sálem, Qalamqas», «Kózimniń qarasy» ánderinen tartyp, Shámshi Qaldaıaqov, Seıdolla Báıterekovtiń ánderin áýeletti. Arasynda ádemi áńgimemen tuzdyqtap otyrdy.
Qurmanǵazy atyndaǵy Qazaq ulttyq konservatorııasynyń rektory Arman Júdebaev pen Ahmet Jubanov atyndaǵy daryndy balalarǵa arnalǵan mýzyka mektep-ınternatynyń dırektory Nurken Áshirovtiń kúı tartysy biraz jurttyń arqasyn qozdyrsa, olarmen birge óner kórsetken dástúrli ánshi, Dánesh Raqyshevtiń shákirti Nurjan Janpeıisovtiń ánderi júrek qylyn shertip jatty.
Sáken Maıǵazıev, Ǵadilbek Janaı, Aıqyn Tólepbergen, Ninety one toby jalǵaǵan konsert aldaǵy ýaqytta da jalǵasyn taba bermek.
