Prezıdent Qasym-Jomart Toqaev elimizdegi tótenshe jaǵdaıǵa baılanysty der kezinde óte shapshań sheshimder qabyldap, málimdeme jasady. Birinshi kezekte elimizdiń eki iri qalasy Nur-Sultan men Almatyda vırýstyń órship taralýyna jol bermes úshin karantın rejimin engizdi. Bul indettiń barlyq respýblıkaǵa jyldam taralýynyń aldyn alýdaǵy asa qajetti shara boldy. Aldaǵy maqsat – aýrýdyń basqa elderdegideı qatty órshýine jol bermeý. Buǵan barsha medısına, quqyq qorǵaý jáne qaýipsizdik organdary, jergilikti bılik organdary atsalysýda. Mundaı jaǵdaıda basty aýyrtpalyqtyń medısına qyzmetkerlerine túsip otyrǵany sózsiz. Olar barlyq kúshterin osy indetpen kúresýge jumsaýda, koronavırýsty juqtyrǵandarǵa kómekterin aıanbaı berýde. Osyny túsine otyryp, jaqynda Memleket basshysy pandemııaǵa qarsy is-sharalarǵa tartylǵan medısına qyzmetkerlerine ústemeaqy taǵaıyndaýdy bekitti. Odan bólek medısına qyzmetkerleriniń densaýlyǵy men ómirin saqtandyrýdy qamtamasyz etýdi tapsyrdy. Bul medısına qyzmetkerlerine memleket tarapynan kórsetilgen úlken qoldaý, indetpen kúresýdiń aldyńǵy leginde júrgenderge degen zor qurmet.
Árıne elimizde basqa da mańyzdy is-sharalar júzege asyrylýda. Ekonomıka úshin osyndaı qıyn kezde memleket tarapynan úlken qarajat bólinip, halyqqa kóptegen áleýmettik qoldaý belgilendi, járdemaqylar men syıaqylar, jeńildikter taǵaıyndaldy. Munyń bári osy kezeńdi birge eńserip, indettiń zalalyn barynsha tez joıýǵa baǵyttalǵan memleket tarapynan jasalyp otyrǵan is-sharalar. Medısına qyzmetkerleri, óz kezeginde, halyqqa kómek kórsetý úshin barynsha kúsh jumsaýda. Elimizdiń ár azamatynyń da jaǵdaıǵa asa jaýapkershilikpen qarap, indettiń taralmaýyna óz tarapynan atsalysqany jón.
Serik AQShOLAQOV,
Qazaqstannyń Eńbek Eri, Ulttyq Neırohırýrgııa ortalyǵynyń prezıdenti
