Qazaqta maqal bar: «Qus uıada ne kórse, ushqanda sony alady» degen. Balańyz da solaı. Jasynda qandaı tárbıe beresiz, óskende sonyń jemisin jeısiz. Islam sharıǵaty boıynsha: ózi jat qylyqqa úıir adam, balasyna sol jat qylyqty isteme dep aıta almaıdy. Sebebi, ol – jalǵanshyl, ótirikshi pende sanatynda. Mysaly, ózi araq iship turyp, balasyna araq ishpe, dep aıtqan adamnyń sózi ótpeıdi.
Osy oraıda, oıǵa túsedi: Ábý Hanıfa atamyzdyń zamanynda, bir áıel kelip, mazhab atasyna (Ábý Hanıfaǵa): «Ustaz, myna balam baldy kóp jeıdi, sodan bolyp isinip ketedi, duǵa oqyp, dem salyp berińizshi» deıdi. Ǵulama ustaz: «Bul qoldan keletin is, biraq 40 kúnnen soń balany alyp kel» dep áıeldi qaıtarady.
Qyryq kún ótken soń áıel balasyn alyp keledi. Ábý Hanıfa ustaz onyń basynan sıpap turyp: «Bal jeme, jaraı ma?» deıdi. Bar bolǵany sol. Sol sátten bastap bala bal jemeıdi. Áıel oılaıdy, balamnyń basynan sıpady da dem saldy, osy bir sát úshin nege 40 kún kúttirdi eken?!
Bir kúni osy kúdigin ustazdan suraıdy: «Bir sátte dem saldyńyz, nege 40 kún kúttirdińiz?». Ustaz aıtypty: «О́zim de baldy jaqsy kórýshi edim, sol sebepti ózim de 40 kún bal jemeı tıylyp alyp, balaǵa dem saldym. Áıtpegende, ózim bal jep júrip, balaǵa «bal jeme» dep duǵa etsem, qabyl bolmas edi» depti.
Mine, aǵaıyn! О́ziń ishimdik paıdalansań, jalǵandyqqa beıim bolsań... sodan keıin, balam aqylymdy almaıdy, aıtqan sózime kónbeıdi dep qalaı aıtasyń?!
