Qazaq tiliniń ǵylym salasyndaǵy qoldanysyn nyǵaıtýda sapaly termınologııalyq sózdikterdiń alatyn orny erekshe. Ult ustazy A.Baıtursynulynyń: «Biz sııaqty mádenıet jemisine jańa aýzy tıgen jurt, óz tilinde joq dep, mádenı jurttardyń tilindegi sózderdi alǵyshtap, ana tilimen jat tildiń sózderin almastyra, aqyrynda ana tiliniń qaıda ketkenin bilmeı aıyrylyp qalýy yqtımal. Sondyqtan mádenı jurttardyń tilindegi ádebıetteriniń, ǵylym kitaptaryn qazaq tiline aýdarǵanda pán sózderiniń daıarlyǵyna qyzyqpaı, ana tilimizden qarastyryp sóz tabýymyz kerek. Sonda bizdiń tilimiz taza bolady» degen pikiri áli kúnge kún tártibinen túsken emes.
Onlaın-konferensııada fılologııa ǵylymdarynyń doktory, professor Sherýbaı Qurmanbaıuly, Q.Jubanov atyndaǵy Aqtóbe óńirlik memlekettik ýnıversıtetiniń professory, fılologııa ǵylymdarynyń doktory Sábıra Isaqova termınologııalyq sózdik jasaýdyń otandyq jáne halyqaralyq tájirıbesine toqtaldy.
Sherýbaı Qurmanbaıuly sózjasamdaǵy birizdilikke basa nazar aýdardy, eger oqý oryndarynda bir sózdiń balamasy birneshe nusqada oqytyla beretin bolsa, bularda bilim alǵan túlekter erteń óndiriske kelgen kezde ózara túsinise almaıtynyn aıtty.
Mundaı qordalanǵan máseleler termınologııalyq sózdikter mańaıynda jetkilikti. Sol sebepti termınologııalyq sózdikter jasaýǵa, olardy jasaýdyń ədistemesin jetildirýge asa mən bergen jón. Atalǵan shara termınologııalyq sózdikter jasaýdyń otandyq jáne halyqaralyq tájirıbesin taldaýǵa, sonyń negizinde termınologııa sózdik jasaýdyń negizgi talaptaryn anyqtaýǵa baǵyttaldy.
