Sarysý aýdany, Jańatas qalasynyń turǵyny, kópbalaly ana Aısulý Tursynbaeva da búginde memleket qoldaýynyń nátıjesinde óz kásibin bastap otyr. Qarjylaı qoldaýdyń ıgiligin kórgen kelinshek asyl tuqymdy zaınen eshkilerin satyp alǵan. Sol arqyly búginde balalarynyń nápaqasyn taýyp keledi. Kásip bastap, tirligin tiktep otyrǵan kelinshektiń bul bastamasy qoldaýǵa turarlyq.
«Memlekettiń qoldaýynyń nátıjesinde 500 myń teńge kóleminde grantty ıelenip, oǵan Jambyl aýdanynyń Asa aýylynan asyl tuqymdy 4 bas eshki satyp aldym. Kúnine eki mezgil saýyp, 10 lıtr sút alamyn. Súti em bolǵan soń turǵyndar da jıi tapsyrys beredi. Alǵan 4 eshki de qazir tóldedi. Aldaǵy ýaqytta mal basyn kóbeıtip, kásibimdi ári qaraı damytsam ba degen oıym bar», deıdi kópbalaly ana. Negizinen eshki maly jyldam kóbeıip, erte aıaqtanyp ketetin ári kúı talǵamaıtyn janýardyń biri. Eshki maly erteden-aq qazaq turmysynda erekshe baǵalanǵan. Sonymen qatar eshki sútiniń emdik qasıeti jóninde de jıi aıtylady. Málimetterge súıensek, Shveısarııa memleketinde týberkýlez, qanazdyq, rahıt, býyn, teri aýrýlaryn áýel bastan eshki sútimen emdegen bolsa, AQSh sekildi iri memleketterde eshki sútin jańa týǵan nárestelerge berý úshin arnaıy daıyndaıdy eken. Sonymen qatar eshki baǵyp, odan jaqsy tabys taýyp otyrǵan elderdiń de qatary kóp. «Eshki sharýashylyǵynyń arqasynda balalarymdy asyrap otyrmyn. Ári eshki súti balalardyń densaýlyǵyna da paıdaly. Kásip bastaǵysy kelgen aýyl turǵyndary úshin barlyq múmkindikti qarastyrǵan Prezıdentimizge alǵys aıtamyn. Sondaı-aq oblys, aýdan basshylaryna da rahmet», deıdi Aısulý Tursynbaeva.
Jambyl oblysy
