Onlaın formatta ótken is-sharaǵa Mańǵystaý oblystyq sotynyń tóraǵasy Erjan Daýlıev, oblystyq sottyń azamattyq ister jónindegi sot alqasynyń tóraǵasy Nursapa Prımashev, aýdandyq jáne oǵan teńestirilgen sottardyń tóraǵalary men sýdıalary, memlekettik jáne quqyq qorǵaý organdarynyń qyzmetkerleri, Bıler keńesiniń músheleri, kásipodaq ortalyǵy men "Atameken" kásipkerler palatasynyń Mańǵystaý óńirlik fılıalynyń ókilderi, advokattar, kásipkerler, notarıýstar, medıatorlar qatysty.
Is-shara barysynda sóz alǵan Nursapa Prımashev Memleket basshysy "Qazaqstan Respýblıkasynyń Azamattyq prosestik kodeksine sottar jumysynyń zamanaýı formattaryn endirý, artyq sot rásimderi men shyǵyndaryn qysqartý máseleleri boıynsha ózgerister men tolyqtyrýlar engizý týraly" Qazaqstan Respýblıkasynyń Zańyna qol qoıǵanyn atap ótip, basty ózgerister men tolyqtyrýlarǵa nazar aýdardy.
Sondaı-aq Nursapa Prımashev APK-ǵa engiziletin túzetýlerge saı, sýdıa basy artyq júktemelerden arylǵanyn, sýdıa eki tarap usynbaǵan dáleldemelerdi suratý arqyly aqıqatqa jetip qana qoımaı, proses barysynda taraptardyń ýájderine qatysty daýǵa saı óz pikirin de bildirýge quqyǵy bar ekenin aıtyp, bul - sot sheshiminiń sapasyna oń áserin tıgizetinin jetkizdi.
Semınar barysynda jekelegen máselelerdi taraptardy shaqyrmaı-aq qaraý, prosestik merzimderdi uzartý jáne qalpyna keltirý, belgilengen aqsha somalaryn ındeksteý, medıatordyń mártebesi men medıasııa mehanızmin prosestik retteý, sýdıalardyń medıasııany júrgizýi jáne medıasııa týraly kelisimdi bekitý rásimderi, elektrondy hattama týraly da keńinen aıtyldy.
Is-shara sońynda qatysýshylar atalǵan zańǵa qatysty oı-pikirlerin ortaǵa saldy.
